Лезги жегьилар фад-фад илифда «Самур» газетдин редакциядиз. Иллаки студентри мукьвал-мукьвал кьил чIугвада чал. Чпихъ къалабулух кутазвай месэлайрикай рахада, дидед чIалакай веревирдер ийида.

    И гъилера редакциядин мугьманар Америкадин Садхьанвай Штатра ва Туьркияда кIелзавай чи ватанэгьлияр тир. «Самурдин» дуст, чи элкъвей столрин вахтунда вичин марагълу теклифралди чешнелу хьайи, гила Канададин Калгари Университетдин инженервилин факультетда кIелзавай Шефа Йолчиев са йис тир чаз такваз.

    Адахъ галаз санал Туьркиядин лезгийри чал вичин хъсан суракьар агакьарай, ина кьиле тухвай поэзиядин нянийра лезги чIалаз чка чара авур Истанбулдин университетдин психологиядин факультетдин студент Заур Бейогълу лагьайтIа, сад лагьай гъилер тир чи редакциядиз илифиз. Заураз поэзиядин нянийрикай сада лезги чIалалди шиир лугьуналди тафаватлу хьайи Истанбулдин Алиш-веришдин Университетдин юриствилин факультетдин студент Серхан Йолчиева юлдашвал ийизвай.

     Абурун ихтилатар гзаф марагълубур, руьгь кутадайбур тир. Акьуллу фикирар лагьай, хъсан теклифар гайи жегьилри дуьньядин гьи пипIе хьунилай асулу тушиз чпи «Самур» газетдиз икрамзавайди малумарна. «Самур» бубад кIвал, чи фикиррин меркез я, - лагьана жегьилри.

 

«Самур»