Бакуда лезги караоке Харусенят  |  1(295) 2016  |  Айнур БАЙБУЛАТОВА
     Алай йисан 15-январдиз Бакудин Прессадин Меркезда сифте яз лезги караокедин мярекат кьиле фена. Седакъет Керимовадин «Лезги чIал хуьн» девиздик кваз туькIуьрнавай и махсус проект кьилиз акъу­дун патал автордиз жегьил программист Нуьреддин Алхасова ва «Самур» газетдин кIвалахдар Айнур Байбулатовади куьмекар гана. Лезги чIалал гзафни-гзаф рикI алай и пуд касдин алакьунар себеб яз и зурба проект инсанрив агакьна. Лезги халкьдин манийрикай ва С.Керимовади теснифна мецера гьатнавай манийрикай арадал гъанвай караоке аямдив кьадайди хьуни виридан фикир желбна. Меркездин чIехи проекторди шикилар регьятдиз аквадай, манияр хъсандиз ван къведай  мумкинвал гана.
     Сад лагьай гъи­лера кьиле тухвай мя­рекатдиз 100-дав агакьна инсанар атана. Абурун арада жегьилар генани гзаф авай. Санал манияр лугьунал рикI алай и ксар чи вилик-кьилик квайбур тир. «Самур» газетдин кIвалахдаррини «Сувар» ансамблдин маничийри мукьувай иштирак авур караокеди сифте манидилай вирибурук руьгь кутуна. Адет яз ижласар кьиле физвай Прессадин Меркездин чIехи зал сифте яз лезги манийрин гурлу ванерив ацIана. Са герендилай Меркездин кIвалахдарривайни акъвазиз хьанач, абурни мярекатдив эгечIна.
     Мярекат ачухарай Седакъет Керимовади дидед чIал, халкьдин меденият, чи адетар, бубайрилай чаз эменни яз амай руьгьдин амарат хуьн гьар са лезгидин буржи тирди малумарна. Ада чи къени адетрик санал мани лугьунни акатзавайди рикIел хкана ва гаф манидиз гана. Сифте манидилай зурба са хор арадал атана. Кьве сят гьикI атана алатнатIани чир хьанач.
     Караокедиз атанвайбуруз «Сувардин» сейли маничияр тир Решад Ибрагьимов, Жавагьир Абдулова, Жемила Залова, Роза Гьажимурадова ва Элвина Гьейдаровадихъ галаз таниш жедай, абурун жанлу ванерихъ мукьувай яб гудай мумкинвал хьана. Абурун аккапеллойри лагьайтIа, межлисдик дад кутуна. Маничийрин гуьгъуьна аваз Эмиль Исмаилова, Самая Керимовади, Азизрин Севдади ва масабуру чпин гьунар къалурна. Абуру манийрик кьил кутун кумазни залди хордалди гуьгъ давамарна.
     Са гафуналди, руьгь кутуна караокеди инсанрик. КцIарай кьилди мярекатдиз атай Тамилла Казимовади, «Сувар» ансамблдин кьуьлдайди Гуьлнара Къарахановади, «Самур» газетдин редактордин заместитель, чи сейли кхьираг Муьзеффер Меликмамедова ва масабуру ихьтин мярекатдин важиблувал къейдна, и караокеди чпиз халисан сувар бахшна лагьана.