РикIериз экв чукIурзавайди Барка  |  1(295) 2016  |  С.КЪАЙИНБЕГАН PУШ
     ЦIуд йис я Дагъустандин гьукуматдин телевиденидин «Вахтар ва инсанар» тIвар алай лезги гунугди дуьньядин лезгияр сад-садав агудиз. ЦIуд йис я эфирдай дидед чIалан иер тIям, адан верцIи дад чав агакьиз. И рикIиз чими гунуг арадиз гъанвайди, ам къени, фасагьатлу чIалалди эфирдай инсанрал агакьарзавайди Исамудин Агьмедов я. 
     Шумудни са йисара чIагъандал ягъиз, лезги халкьдин гьавайралди инсанрин гьиссерал звал гъайи и касди вичихъ журналистикадин рекьяйни алакьунар авайди виридаз субутна. 
     За квез вичикай ихтилатзавай Исамудин Мирземегьамедан хва 1956-йисан 15-майдиз Дагъустан Республикадин Кьурагь райондин Урсун хуьре дидедиз хьана. Аял чIавалай чи халкьдин макьамрал рикI алай ам Шимихуьруьн мектебда 8-синиф акьалтIарна вичин мурадрин гуьгъуьнаваз Дербентдиз рекье гьатна. Ина музыкадин училищеда чIагъандин синифда чирвилер къачуна Кьурагьин музыкадин мектебда муаллимвал авуна, аскервиляй хтайла СтIал Сулейманан тIварунихъ галай Лезги Театрда кIвалахна. Вичихъ чIехи алакьунар авай жегьил гуьгъуьнай Дербент шегьердин медениятдин кIвалин директорвиле тайинарна. Ингье гьина кIвалахайтIани, вичин рикI алай сенят – чIагъандал ягъун рикIелай ракъурзавачир. Ада шанкьунив, халкьдин руьгьдин ивиррал рикI алаз ягъизвай гьаваяр инсанрин дегьне гьиссер юзурдайбур тир. Ингье сеняткардиз гегьенш майдан кIанзавай. 
     1983-йисуз Магьачкъаладиз куьч хьайи Исамудин Республикадин медениятдин училищеда кIвалахал акъвазна. Ара датIана чирвилерихъ ялзавай ам Дагъустандин Гьукуматдин Университетдин филологиядин факультетдик экечIна, ина заочныдаказ кIелна. 
     ЧIагъандай суьгьуьрлу ванер акъуд­завай пешекар сеняткар хьиз вири Дагъустандиз сейли хьайи Исамудин 1990-йисуз Дагъустандин Гьукуматдин Телерадиодин кьилевайбурун тIалабуналди инин халкьдин инструментрин ансамблдин регьбервиле тайинарна. 1993-йисуз И.Агьмедоваз музыкадин программайрин редакторвал теклифна. Яргъал йисара чи халкьдин сейли манидар Асеф Мегьмана регьбервал гайи и программа ам пенсиядиз экъечIунихъди акъвазнавай. 
     1995-йисуз И.Агьмедоваз «Дагъустан Республикадин лайихлу артист» тIвар гайила и шад хабарди адан сенятдал рикI алай вирибуруз хвеши авуна. 
     2000-йисуз Россиядин Иваново шегьерда «Ягъ, чIагъан» тIвар алаз кьиле фейи Вирироссиядин  конкурсда сад лагьай чка кьур лезгидин - Исамудин 
Агьмедован суракьар вириниз чкIана. РФ-дин сад лагьай каналдай адан  чIагъандал ягъун акур ватанэгьлийрин хвешивилин и кьил-а кьил авачир. Россиядин цIудралди пешекарри Исамудин зурба сеняткар тирди хиве кьунай.
     2002-йисуз И.Агьмедоваз «Дагъус­тан Республикадин халкьдин артист» гьуьрметдин тIвар гана. Ада вич и тIварцIиз лайих тирди гьа йисуз Россиядин Новосибирск шегьерда кьиле фейи гармонистрин, аккордионистрин ва баянистрин виридуьньядин конкурсда мад гъилера субутна. Дуьньядин чара-чара пипIерай атай вишералди макьамчийрин арада сад лагьай чкадиз лайих хьун и гъи­лерани чи ватанэгьлидиз несиб хьана. Ингье и гъалибвал регьятдиз арадиз атаначир. Ам сеняткарди йифди-югъ­ди чIугур зегьметрин нетижа тир. Исамудин Агьмедов мукьувай чизвай ксари ихтилатзавайвал, адан тупIар чIагъандин мецерал акьван устадвилелди къекъведа, анай акьван иер ванер акъудда хьи, пагь атIуда ви. Иллаки халкьдин манияр ядайла кьиляй-кьилди абурун есирда жеда ам. Дагъустандин музыкадин къизилдин фондуна ада солодал ягъай цIудралди гьаваяр хуьзва. Абурухъ сеняткарди вичи теснифнавай «Уружар», «Музанар» хьтин кьуьлдай гьаваярни ава. Вичин хуьруьз бахшнавай «Урсун» гьавадихъ яб акалайла кIарабра звал гьатда. 
     2006-йисалай Исамудин Агьмедова вичин алакьунар журналистикадин рекьяйни къалуриз эгечIна. Дагъустандин телевиденидиз цIийи нефес гъайи ам чи халкьдин гьалар, адан ацукьун-къа­рагъун килигзавайбурув агакьариз алахъна. Къе интернет себеб яз «Вахтар ва инсанар» гунуг дуьньядин чара-чара уьлквейра яшамиш жезвай лезгийрин кIвалерин рикI алай мугьмандиз элкъвенва. Гунугдин кьетIенвилерикай сад ам арадал гъизвай кас вич сеняткар хьунухь я. Ихьтин ксарихъ дуьнья иер рангаринди, инсанар къени къилихринди яз аквадай алакьун жеда.
     Вичихъ иер суй авай и кьакьан буйдин, тIарам тандин, экуь вилерин касдихъ авай виридалайни чIехи алакьун лагьайтIа, хъсан ихтилатар авун я. Адалай инсанар рахурун хьиз, абурухъ яб акалунни алакьда. Гьавиляй «Вахтар ва инсанар» виливди хуьда гзафбуру. Ихьтинбурун арада адан хизан – уьмуьрдин юлдаш, хвани, рушни ава. Вучиз лагьайтIа и гунугдай рикIериз экв чкIида.
     Алай йисуз вичин 60 яшар жезвай Исамудин Агьмедоваз чна мадни чIехи агалкьунар тIалабзава.