Жуввал хуьн! Редактордин гаф  |  1(295) 2016  |  С.КЕРИМОВА
     ЦIийи йисан рикI ахъайдай хабаррикай сад Азербайжан Республикадин Президент Илгьам Алиева 2016-йис мультикультурализмдин  йис тирди малумарун хьана. Им акI лагьай чIал я хьи, чи республикадин кьадардиз тIимил халкьар, чара-чара динрин, тарикъатрин векилар генани кваз кьада, абурун месэлаяр гьялун патал галайвалда, чпин чIал, меденият, адетар хуьн паталди абуру ийизвай алахъунрик гьукуматдини къуьн кутада.
     ХупI хъсандиз атанвачни йис! Эхь, им умудрин йис я, кутуграй ам чаз! Вини кьиле авай, чпив гьукум гвай ксари чахъ яб акалрай, чаз крар гуьнгуьна кутаз куьмек гурай. Лезгийрин крар лагьайтIа, вири дидед чIалахъ, медениятдихъ ялзавайбур я. 
     Са йисалай вичин 25 йис тамам жезвай, 1997-йисалай, яни и гафарин авторди газетдиз регьбервал гуз эгечIай йикъалай гьукуматдин патай са куьмекни авачиз акъатзавай «Самур» газет кIевера гьатнавайди мад гъилера рикIел хкиз кIанзава заз. Пулунин такьатар авачирвиляй эхиримжи йисара вацра садра чап жезвай газетдин гьалар хъсанзавач. Азербайжандин лезгийрин уьмуьрда кьетIен вакъиадиз элкъвенвай, лезги чIалан женгчи хьиз сейли хьанвай,   Азербайжандин лезгияр гзаф яшамиш жезвай районрин, хуьрерин мектебра вичикай лезги чIалан чирвалаг хьиз менфят къа­­­чузвай «Самур» акъудун гзафни-гзаф четин хьанва. Адаз гьукуматди къайгъударвал къалурнайтIа хупI хъсан жедай.
     Чи Кьулан вацIун тIвар алай, чи халкьдин чIал, тарих, меденият, адетар хуьзвай «Самур» газет 24 йисуз куьне хвена, играми кIелдайбур! Куьне ам кхьеначиртIа, куьне чахъ руьгь кутуначиртIа, чавай ам акъудиз жедачир. Республикада кьиле физвай вакъиаяр, девальвация, пул къиметдай аватун, чапдин харжияр хкаж хьун ва масабур себеб яз Бакуда цIудралди газетар акъатзамач. Ингье Азербайжандин авайни-ава­чир са лезги газетдиз чна санал аявал тавуртIа, кIев жеда ам. Чи руьгьдин ивирар хуьзвай, дидед чIалан таъсиб чIугвазвай «Самур» газет чап авуниз куьмек гун алай аямда чи халкьдин намусдин месэладиз элкъвенва.  
     Мультикультурализмдин йис кьа­дардиз тIимил халкьар, абурукай яз лезгияр патал са хабардарвал я: чи пун-кьил вуч ятIа, чун вужар ятIа чи рикIел хкизва, жуван тарихар, дидед чIал, дегь адетар хуьн, жуван медениятдал дамахун чи кьетIен везифа тирди чав кьатIуз тазва, жуван милли къанажагъ, руьгьдин кьакьанвал хвена кIанзавайди, халкь паталди кьегьалвилелди, къени кра­рихъ гелкъуьн чи буржи тирди чирзава ада чаз.
     И дуьньяда инсанрин кьилел къвезвай вири татугайвилерин бинеда савадсузвал ава. Газет, ктаб кIелзавачир, вичин чирвилер артухарзавачир инсандиз бегьемди лугьуз жедач. Гьайиф хьи, къе чи халкьдин арада лезги чIал негьзавайбур, дидед чIалал акъатзавай газетар, журналар, ктабар кваз кьазвачирбурни гзаф ава. Халкь паталди алахъзавай, адан рикIе экв куькIуьриз кIанзавай женгчийрал къимет эцигиз гьелени чир хьанвач садбуруз. 
     ЦIинин йис четинвилералди алукьнава. Анжах ада чаз Азербайжандин авай-авачир са лезги газет акъвазардай гьахъ гузвач. Четинвилери инсанар кIевера туртIани, рекьерни къалурда. Ада къенятдиз вердишарда. Ингье гьар вуч къенят авуртIани, руьгьдин каш алудзавай затIар хуьн. Гьар са халкьдин сад лагьай дамах адан чIалал акъатзавай газет тирди рикIелай ракъур тийин.
    ЦIи чи республикада мультикультурализмдин йис я. Им чун хьтин халкьар патал са имтигьан я. Чаз жуввал чир хъийидай, жуванбурал къимет эцигиз, жуванбурун алакьунрал дамахиз тадай имтигьан. Акван чавай и имтигьандай экъечIиз жедатIа…