Газет кхьизвайбур пара жезва "Самур" - 20  |  3(250) 2012  |  Азизрин Севда

Алай вахтунда Хачмаз районда «Самур» газет кхьенвайбурун кьадар 250-дав агакьнава. Абур Хачмаз ва Худат шегьерра, Ялама, Лечет, Набран, Мукьтадир хуьрера яшамиш жезвай чи ватанэгьлияр я. Гьар гъилера «Самур-дихъ» рикI кузвай, адан таъсиб чIугвазвай и инсанрихъ галаз гуьруьшмиш хьайила рикI шадвилин гьиссерив ацIуда чи. Вучиз лагьайтIа алатай йисари чун мукьва-кьилияр хьиз агуднава, чи руьгьдин мукьвавилер арадал гъанва.
Чи газетдихъ ялзавай, ам ярар-дустарин арада теблигъзавайбурук Хачмазин тIвар-ван авай юрист Рауф Няметов, Худатин беледиедик квай, ина «Самурдин» корпунктдин кьил тир Бегьрам Залов, Лечетрин юкьван мектебдин директор Маина Ханме-това, Лечетрин беледиедин кьил Явер Ханметов, Яламадин юкьван мектебдин директор Шагьнамаз Севзиханов, жегьил карчи ва кхьираг Камран Къурбаналийрин хьтин инсанар акатзава. Абурун алахъунар себеб яз газет кхьизвайбурун кьадар къвердавай пара жезва.
Шагьнамаз муаллимди са береда вичи акьалтIарай хайи Яламадин юкьван мектебдин директорвиле кIвалахиз ругуд йис я. Виликдай ада Хануба хуьруьн мектебдиз регьбервал ганай. «Самурдин» сад лагьай тилитдилай газетдиз майилвал авур и касди къедалди и алакъаяр атIанвач. И мектебда газетдал рикI алай муаллимар гзаф ава. Абурукай садни физикадинни математикадин муаллим Жамаледдин Кьасумов я.
Газет датIана виливди хуьз-вай са касдикай лагьайтIа, чаз кьилди ихтилатиз кIанзава. Ам Къафлан Веледов я. 1930-йисуз КцIар райондин Манкъулид-хуьре дидедиз хьайи ада 1950-йисуз Къубадин Гьукуматдин Муаллимрин Институт акьал-тIарна. А чIаван Худат райондин Къусарчай, Дедели хуьрерин, Худат ше-гьердин мектебра муаллимвал авуна, Худатин РОНО-да методкабинетдин методиствиле кIвалахна. Вичин 82 йис хьанвай агъсакъал и мукьвара пенсиядиз фенва. Газет са цIарни тутуна кIелзавай, теблигъзавай ада чка атунивай ам кIелза-вачирбур, адахъ рикI кузвачирбур туьнбуьгьни ийида. Жуван халкьдалди, адан чIалалди дамахиз алакьзавачир кас бахтлу инсан я лугьуз жедач, - лугьуда Къафлан муаллимди.

Азизрин Севда