“Лезги хуьр” Хъсан хабарар  |  7(323) 2018  |  Дагъви Шериф, “Лезги газет”
     Магьачкъалада “Лезги газетдин” редакцияда “Лезги хуьр” лишандик кваз документрин бинедаллаз ара­дал гъанвай фильмрин международный конкурсдин нетижаяр кьунин мярекат кьиле фена.
     Конкурсдин тешкилатчияр лезгийрин ме­дениятдин Харьковда кардик квай “Са­мур” тешкилат ва “Лезги газетдин” ре­дакция тир. Лагьана кIанда, “Лезги хуьр” конкурс алатай йисуз ма­лумарнай. “Самур” тешкилатдихъ ихьтин конкурсар гележегдани тухудай фикирар ава.
     Финалдиз Азербайжандай тир лез­гийрин машгьур шаир, “Самур” газетдин кьилин редактор Седакъет Керимова, “Дагъустан” РГВК-да “Вахтар ва инсанар” передача кьиле тухузвай Исамудин Агьмедов, ери-бине Хуьруьгай тир, алай вахтунда Тюменда яшамиш жезвай Сади Омаров акъатна.
     Мярекатдиз “Самур” тешкилатдиз регьбервал гузвайбурукай тир Бедел Бе­делов, Феликс Нагъиев, конкурсдин жюридик акатзавай гьуьрметлу ксар, журналистар атанвай.
     Мярекат гатIундайла  “Лезги газет­дин” кьилин редактор Мегьамед Ибра­гьимова редакциядин конференц-зал цIи­йикIа туьхкIуьр хъувур кьегьал хва, эмин­­хуьруьнви Шагьпаз Асахановаз, куь­мекар гайи Билбил-Къазмайрилай тир Пакизат  Рагьимхановадиз сагърай лагьана ва абурув чухсагъулдин чарар вахкана.
     Феликс Нагъиева конкурсдин кьилин макьсад чи багъри ерийрин тарих, хуьрерин ва анрин агьалийрин гьалар,  къадим аде­тар ва чи халкьдин ацукьун-къарагъун къалурун, фильмрин куьмекдалди абур же­гьил несилрив агакьарун тирди рикIел хкана, конкурс Харьковда авай лезгийрин медениятдин “Самур” тешкилатдин 10 йисан юбилейдиз талукьарнавайди  къейдна. Адан гафарай малум хьайивал, конкурсдиз 18 фильм ракъурнавай. КIуьд касдикай ибарат комиссияди рейсадвилелди Яйла (Туьркия), Кьуьхуьр (Азербайжан) хуь­рерикай фильмаяр туькIуьрай Седакъет Керимовадиз 1-чка гана. Кьвед лагьай чкадиз Къара-Куьредикай фильм туь­кIуьрай  Исамудин Агь­медов, пуд лагьай чка­диз Хуьруьгрин хуь­руькай фильм арадал гъайи Сади Омаров ла­йихлу хьана. Абурув “Са­мур” тешкилатдин диплом, пулдин премия ва Харьков шегьердикай кхьенвай кта­бар  вахкана. Дип­ломралди ва пулдин премийралди гьакIни Лезги радиодин къуллугъчи Нарима Жамаловадин “Испик” ва шаир Шагьабудин Шабатован “Илиф Макьаз” фильмаярни къейдна.
     Идалай кьулухъ “Самур” теш­килатдин векилри чпихъ галаз датIана алакъаяр хуьнай, ихьтин мярекатар теш­килиз куьмекар гунай, Украинада яшамиш  жезвай чи ватанэгьлийрикай халкь хабардар авунай “Лезги газетдин” ре­дакциядин коллективдив Гьуьрметдин гра­мота вахкана.
     Гуьгъуьнлай конкурсдин гъалибар РГВК-дин “Вахтар ва инсанар” передачада элкъвей столдин мугьманар хьана.
 
Дагъви Шериф, 
“Лезги газет”