CтIал Сулейманан район Да­гъустан Республикадин виридалайни иер тIебиат авай пипIерикай сад  я. Райондин чилерал алай кьакьан суварин, инин мегъуьн ва пипин тарарин чIехи тамарин суракьар яргъариз чкIанва. Ина 2500-далай гзаф набататар гьалтзава. Райондин гьайванрин алем иллаки девлетлу я. Райондин майвадин багълари, гьакIни ципицIлухри гьар йисуз бул бегьер гузва. Дагъларини кIамари, суварини дуьзенлухри ина туризм вилик тухун патал къулай шартIар арадиз гъизва. 

     Юкьван СтIал хуьр вириниз сей­ли авунвайди лагьайтIа, инин вир я. Хуьруьнбуру ва мугьманри ял ягъидай кье­тIен чка тир и вирелай иллаки гатуз гзаф мугь­манар алахьда. Булахрин церикай арадиз атанвай и тIебиатдин иер маканди зур гектардин чка кьаз­ва, адан деринвал 3 метр я. Ял ягъи­дайбур патал ина 20 пуна, 3 ката­маран, 2 луьткве ава. Балугъчияр па­тал ина къулай шартIар туькIуьрнава. Абурун туруниз лацу амур, карп, форель, сазан ва маса балугъар аватда.

     ТIебиатдин иервилер, михьи гьава, къушарин ванер какахьай секинвал,  луьткведа аваз къекъвен, ахпани лезгийрин цIун кIвалин са-садалай дадлу тIуьнар… Идалай хъсан вуч жеда кьван? Эхь, иниз садра илифайбуруз мад хквез кIан жеда.

 

Айнур БАЙБУЛАТОВА