РикIел хуьх! "Самурдин мектеб"  |  4(330) 2019  |  
     ТIварцIиэвезар ва абурукай жезвай наречияр дуьз кхьин патал агъадихъ галай къайдаяр рикIел хуьх:
     1) Къалурунин ва суалдин тIварцIиэвезрин теквилин кьадардин асул падеждин эхирда м гьарфунилай гуьгъуьниз ачух гьарфар а, и са дуьшуьшдани кхьидач. Месела: ам, им, атIам, агъам, виним, гьим?
     2) Винидихъ къалурнавай тIварцIиэвезар (им, ам ва мсб.) теквилин ва гзафвилин кьадарра падежриз дегиш жедайла, абурун эхирда авай м гьарф акъатда, падеждин эхир адалай вилик квай ачух гьарфунихъ акал жеда. Месела: ам, ада, адан, абур, абуру, абурун; им, ида, идан, ибур, ибуру, ибурун ва мсб. А тIварцIиэвезар икI кхьидач: анда, инда, анбур, инбур.
     3) – икI суффиксдин куьмекдалди тIварцIиэвезрикай туькIуьр жезвай наречияр эхирда а гьарф авачиз кхьида. Месела: икI, акI, гьикI, гьакI. ТIварцIиэвезрикай туькIуьр хьанвай наречийрик чIурукIа, къеникIа, цIийикIа, сакIа, масакIа гафарни акатда.
     4) Къалурунин (ишарадин) тIварцIи­эвезрикай (и, а  ва мсб.) маса гафарин дибар (кьван, сятда) акал хьана туькIуьр жезвай наречияр санал кхьида. Месела: икьван, акьван, гьикьван? гьакьван, исятда, гьасятда.
     5) Ксариз талукь тIварцIиэвезар асул падежда эхирда н аваз кхьида, талукьвилин падежда н авачиз: зун, вун, гун, куьн (асул падеж); зи, ви, чи, куь (талукьвилин падеж).