«Самур» газет Эльбрусдин кукIушдал Лезгияр вирина  |  9(335) 2019  |  Зекера ЗАХАРОВ
   Дагъларал рикI алаз абурун кукIушар рам авун вичин мурад тирди хайибуруз, дустариз, кIвалахдин юлдашриз фадлай субутнава Низами Рустамова. КцIар шегьердин «ОКИ» клиникадин духтур тир ам тIебиатдални спортдал рикI алай инсан я. Вичин велосипеддал алаз КцIар райондилай, ништа, шумудра цIар ягъанватIа ада. Хъсан духтур хьиз тек КцIар райондиз ваъ, масанризни сейли тир адан зегьметдал гзафни-гзаф рикI ала. ТахьайтIа адавай дагълар рам ийиз жедайни?
   КцIар райондин чилерал алай дагъларин  кукIушрал са шумудра акьахнава ам. ТIурфан дагъ (4191 м), Базарюрт (4126 м), Яру дагъ (4116 м),
Гирве (3963 м), Нисен дагъ (3660 м) рам авун ам паталди гзаф регьят кар я.
   Шагьдагъдин 4243 метр кьакьанвиле авай кукIуш ада вадра рам авунва. Базардуьзуьдин 4466 метрдин кукIушдал Н.Рустамов пудра акьахнава. И кукIушрал  ада гьар гъилера «Самур» газет акъуднава ва вичи Азербайжанда чап жезвай и лезги газетдал дамахзавайди виридаз субутнава. Эхь, и кIанивал ада датIана малумарзава. Чи газетдин гьар са тилит виливди хуьзвай, абур са цIарни тутуна кIелзавай Низами Рустамов «Самур»дин кIеви дуст я. 
Алай йисан гатуз ада кьвед лагьай гъилера Эльбрус дагъдин кукIуш рамна.  Сад лагьай гъилера ам анал 2017-йисуз акъахнай. 5642 метрдин кьакьанвилиз ада «Самур» акъудна ва мад гъилера дидед чIалал акъатзавай чи газетдиз вичи гьикI икрамзаватIа субутна.
   Авайвал лагьайтIа, и хабарди чун гзафни-гзаф шадарна ва кIелзавайбурун вилик чи жавабдарвал генани артухарна. Чна дидед чIал дагъдин кукIушар хьиз вине кьазвай чи кьегьал ватанэгьлидиз мадни чIехи агалкьунар тIалабзава, адаз мадни кьакьан кукIушар рам авун тIалабзава. Чна валди дамахзава, дагъларин хва!
Зекера ЗАХАРОВ