АГАЛКЬУНРИН РЕКЬЕ Юбилей  |  1(338) 2020  |  С.КЪАЙИНБЕГАН РУШ
   Са шумуд югъ инлай вилик Азербайжандин тIвар-ван авай театрдин режиссер, республикадин халкьдин артист, Медениятдин ва Харусенятдин Университетдин профессор, Азербайжанда Камерадин Театр арадиз гъайи зурба сеняткар Женнет Селимовадин 80 йис хьана. 
   Женнет Алибеган руш Селимова 1940-йисан 20 - январдиз Бакуда дидедиз хьана. Вичин зурба алакьунралди, лезги къилихралдини такабурлувилелди  сейли тир и викIегь дишегьлидин буба  Алибег  Дагъустандин Ахцегь райондай тир. 10 йиса аваз етим амукьай Алибег кьисметди  Бакудиз акъуднай. Ина кIвалахал акъвазна четинвилелди чIехи хьайи ада вичиз кIвал-югъ авунай, гуьгъуьнлай Анна Коренманахъ галаз хизан туькIуьрнай. Чпихъ кьве аял хьайи абурун хва Мусабег 10 йиса авайла начагъвиляй телеф хьанай. Хизандин кьилел атай и мусибатди дидединни бубадин хьиз, гъвечIи Женнетан рикIелни хер авунай. Зегьметдивни намуслувилив кьил хвейи бубани диде вичин уьмуьрдин рехъ хкядайла Женнетаз чешне хьанай. Хайибуру адан къилихриз уьтквемвал гъанай. 
   Юкьван мектеб тафаватлувилелди акьалтIарай руш 1957-йисуз Азербайжандин Гьукуматдин Университетдин филологиядин факультетдик экечIнай. Инаг яру дипломдалди акьалтIарай Женнет вичин мурадар кьилиз акъудун патал Ленинграддиз рекье гьатнай ва 1962-йисуз Ленинграддин Гьукуматдин Театрдинни Кинематографиядин Институтдин режиссервилин факультетдик экечIнай. 1967-йисуз институт акьалтарай ам Бакудин С.Вургъунан тIварунихъ галай Урусрин Драмтеатрда режиссервиле кIвалахал акъвазнай. Са шумуд йисалай ам Музыкадин Комедиядин Театрдин режиссервиле тайинарнай. 
   Вичихъ зурба алакьунар авай Женнет Селимовади Бакуда сифте яз Камерадин Театр арадал гъанай ва гзаф йисара адаз регьбервал ганай. 1972-йисуз республикадин лайихлу артист ва 1999-йисуз халкьдин артист хьтин гьуьрметдин тIварариз лайихлу хьайи Ж.Селимовади 2001-йисалай Президентдин пенсия къачузва. Медениятдин ва Харусенятдин Университетдин профессор Женнет Селимовади  2009-йисан 8-апрелдилай 2012-йисан 1-сентябрдалди          Азербайжандин Гьукуматдин Жегьил Тамашачийрин Театрдин кьилин режиссервиле кIвалахнай. Алай вахтунда ам гьа театрдин къурулуш гузвай режиссер я. 
   Ж.Селимовадин гъуьл Азербайжандин Гьукуматдин Музыкадин Комедиядин Театрдин виликан директор, Къазанфер Топчуев тир. Ж.Селимова машгьур алим, Калифорниядин Беркли Университетдин  профессор Луьтфи Задедин халадин руш я. 
   Яратмишунрин рекьяй къазанмишай зурба агалкьунрай вич «Шуьгьрет» ва «Шереф нишаны» орденриз лайихлу хьайи Женнет Селимова са шумуд югъ инлай вилик Азербайжандин Президент Илгьам Алиеван серенжемдалди «Шереф» ордендиз лайихлу хьана.
   Чна Женнет ханумдиз юбилей мубаракзава, адаз чандин сагъвал ва яратмишунрин рекье генани чIехи агалкьунар тIалабзава.
 
 
С.КЪАЙИНБЕГАН РУШ