Чириз кIанзава "Самурдин мектеб"  |  9(244) 2011  |  

Играми редакция! Куьне «Самур» газетдин чинриз гьамиша марагълу хабарар акъудзава. Са шумуд йис инлай вилик заз газетдин чинрай Кьибле Дагъустандин Ярагъ Къазмайрин хуьре чIехи алим ва женгчи Шейх Мегьамед Ярагъвидин мискIиндин комплекс эцигзавайди чир хьанай. И ниятдалди 2007-йисуз Дагъустан Республикадин гьукуматди Мегьамед Ярагъвидин фондуниз кьве миллион манат, гьакIни лезги олигарх Сулейман Керимова кьве миллион манат пул янай.
Са гафни авачиз, лезги  чилел ихьтин комплекс эцигун гьам чIехи вакъиа я, гьамни дамах кутадай кар. Играми редакция! Гила чаз чириз кIанзава: Комплекс эцигна куьтягьнани? Ам гьихьтинди хьанва? Жечни и месэладикай кхьейтIа? Чна квевай комплексдин гьакъиндай малумат гун тIалабзава.
А.Саидов,
Исмаиллы район


***

Са вахтунда зал «Самурдин» чинрай вич Бакуда дидедиз хьайи, ина жавабдар къуллугъар кьилиз   акъудай сейли архитектор, Бакуда, Магьачкъалада, Москвада ва дуьньядин шумудни са шегьерра хкажнавай зурба дараматрин проектрин автор, Россиядин Халкьарин Архитектурадин Академиядин профессор Гьажимурад Шугаеван гьакъиндай малумат гьалтнай. Гь.Шугаева Туьркияда, Вьетнамда, Иранда, Люксембургда ва маса уьлквейрани зурба гелер тунва. Инра ада эцигнавай дараматар дуьньядин архитектурадин инжияр я. Гьуьрметлу редакция! Газетдин чинриз и машгьур лезгидикай макъала акъуднайтIа хупI хъсан тир!
С.Мурадова,
Баку