Адан уьмуьр чешне я Юбилей  |  5(350) 2021  |  САМУР
    Вичин къилихар хьиз, уьмуьрдин рехъни яратмишунар гзафбуруз чешне тир, зурба эсерралди лезги эдебиятдик чIехи пай кутунвай Расим  Гьажи (Гьажиев Расим Гьажидин хва) 1941-йисан 10-июндиз Кцlар райондин Вурварин хуьре дидедиз хьана. Хуьруьн юкьван мектеб акьалтIарна Бакудиз фейи ада нафтIадин мяденра кIвалахнай. Аскервал кьилиз акъудна Магьачкъаладиз рекье гьатай жегьилди портуна фялевал авунай, эцигунра бетонщик кIвалахнай. Гуьгъуьнлай ада Дагизда корректорвиле кIвалахнай. Адан сифте эсерар 60-йисара республикадин «Коммунист» газетдин ва «Дуствал» литературадин кIватIалдин чинриз акъатнай.
    Р.Гьажиди Москвадин Литературадин Институт акьалтIарна гзаф йисара Дагизда, «Коммунист» газетдин редакцияда ва «Кард» журналдин редакторвиле кIвалахна. 
    Расим Гьажидин 1967-йисуз чапдай акъатай «Диде ва дагълар» тIвар ганвай сад лагьай ктабди лезги эдебиятдиз вичин хатI, кьетIен темаяр авай гзаф савадлу кхьираг атанвайдакай хабар ганай. А ктабдиз сифте гаф шаир Алирза Саидова кхьенай. «…И ктаб инсандин бахтуниз ва бахтсузвилиз, чи дидейрин ва бубайрин хушвилиз ва игитвилиз, четин, гагь-гагь инсафсуз кьисметдин татугай кьуьруькриз, амма гьикI хьайитIани, къванцин кIаник кутуртIани, гуьлледив ягъайтIани гъалиб жедай гьахълувилиз, са гафуналди, инсандин, Ватандин такабурвилиз бахшзава», – кхьенай шаирди. И гафар Расим Гьажидин санлай вири яратмишунриз талукьариз жеда. 
    Расим Гьажи цIудралди гьикаяйрин, повестрин ва романрин кIватIалрин («Диде ва дагълар», «Катра макан», «Стхайрин йифен гуьруьш», «Яргъал йисарин мани», «Шагь Абасакай риваят» ва мсб.) автор я. Адан гзаф эсерар урус чIалаз, Дагъустандин ва къецепатан чIалариз таржума авунва. 
    Расим Гьажидин Булат Окуджавади урус чIалаз элкъуьрнавай «Дети Самура» тIвар алай ктаб Москвада 1976-йисуз басма хьанай. 1977-йисуз адан «Стхайрин йифен гуьруьш» ктаб  «Роман-газетади» чапнай. 1978-йисуз и эсер фин чIалаз элкъуьрна Петрозаводскда  «Пуналлиппа» журналда ва «Советская литература» журналда ингилис, немец, француз, польяк ва маса чIаларал чапнай. 
    «Шагь Абасакай риваят» ктабдай Расим Гьажи 1992-йисуз Дагъустан Республикадин СтIал Сулейманан премиядиз лайихлу хьанай. 
Къелемэгьли 2008-йисан  7-январдиз рагьметдиз фена.
 
"Самур"