Чемпион Спорт  |  6(351) 2021  |  АЗИЗРИН Севда
    И иер, акьуллу рушалди кцIарвийри рикIяй дамахун дуьшуьшдин кар туш. Ада вичин алакьунралди КцIарин таэквондодин мектебдин тIвар вириниз сейли авунва. Севда Пирсаидовадин 20 яшар я. Бакудин Спортдин Академиядин 3 лагьай курсуна кIелзавай и руш 10 йис я таэквондодив машгъул жез. 
    ГъвечIи чIавалай викIегьвилелди маса аялрилай тафаватлу тир, вичин хатурдихъ хкIурайла чIехи гадаярни гатазвай и руш эхирни хайибуру тренер Камран  Къарибован кьилив тухванай. Ада лагьанай:
    – И рушакай жеда!
    Хьунни авуна: кьве йисалай аялрин арада республикадин чемпион хьайи Севдади 3 йисуз датIана гьа титул вичив хвена. 
    2013-йисуз Европадин чемпионатда кишпирдин медаль къачур Севда Пирсаидова 3 йисуз датIана рушарин арада республикадин чемпион хьана. 2014-йисуз аялрин арада Европадин чемпионатда 3 лагьай чка кьур ам 2015-йисуз Европадин чемпионвилиз лайихлу хьанай. 2018-йисуз жегьилрин арада Европадин чемпион тIвар къачур лезги руш алай вахтунда республикадин чемпионатдиз гьа-зур жезва. Декабрдин вацра кьиле фена кIанзавай акъажунрани ада сад лагьай чка кьадайдан чIалахъ я чун.
 
Азизрин СЕВДА