“Самурдин” 30 йис жезва Редакциядиз чар  |  7(352) 2021  |  САМУР
Чаз хвешизва
 
    Играми редакция! Квехъ галаз мукьувай алакъаяр авачтIани, за «Самурдин» гзаф нумраяр гъилик ийиз кIелзава ва къиметлу ивир хьиз хуьзва. Заз газетар Хачмаз райондин Агъязи хуьре яшамиш жезвай зи хайибуру ракъурзава. Жув и хуьряй яз шумуд йисар я за Тюменда кIвалахиз. Хуьруьз хтайла газетар жува хутахзава. Гьар нумра цIарни тутуна кIелайдалай кьулухъ за абур дустарив вугузва. Гьа икI, ина «Самурдин» кIелдайбур къвердавай пара жезва. 
    И кьиляй лугьун хьи, Тюменда агъзурралди лезгияр ава. Эхир вахтара Къуба патай атанвайбур генани гзаф я. Чун ватандивай яргъара жуван чIални милливал хуьз алахъзава. Ина чахъ медениятдин меркез, чIал ва адетар хуьз куьмек гудай курсар, лезги мектеб ава. И мектебда «Самур» газетдикай гегьеншдиз менфят къачузва. Чна СтIал Сулейман, Етим Эмин, Шагь-Эмир Мурадов, Муьзеффер Меликмамедов, Фейзуддин Нагъиев хьтин чи сейли къелемэгьлийрин са кьадар ктабарни гъилик авунва ва абур кIелзава.
    Эхиримжи гъилера за «Самурдиз» са шумуд йис инлай вилик кхьенай ва куьне а чар чапнай. И гъилера зун квез чар кхьиз мажбур авурди гьам газетдин виликай къвезмай 30 йисан юбилей, гьамни Седакъет Керимовадин «Къайи рагъ» фильм хьана. Чна а фильмдиз чи медениятдин меркезда чIехи экрандай килигна ва мадни килигзава. Гьикьван рикIериз эсердай, гьикьван метлеблу, гьикьван лезги халкь вири дуьньядиз сейли ийизвай фильм я «Къайи рагъ». Адаз килигайла чи гьиссерал са масакIа звал атана, чи рикIер юзана, чи вилерал накъвар акьалтна. Мад гъилера дамахна чна чи халкьдалди. Руьгь кутуна чак фильмди. Гьавиляй за жуван чирхчирар тир цIудралди лезгийрин тIварцIихъай Седакъет ханумдиз разивал къалурзава. Чахъ «Самур» хьтин газет, «Къайи рагъ» хьтин фильм ава лугьуз хвешизва чаз. Квез мадни чIехи агалкьунар хьурай! Куьн гьамиша аваз хьурай!
 
Шагьмир Искендеров,
РФ-дин Тюмень шегьер
 
Къадир жен
 
    «Самур» газет акъудзавай чи играми къелемэгьлияр! Вуч хъсан я хьи, чахъ куьн хьтин журналистар, «Самур» хьтин газет ава. Куьне чи тарихдикай, чIалакай, медениятдикай, адетрикай, этнографиядикай, машгьур ксарикай, лезги чIалан халкьарикай газетдин чинриз акъудзавай макъалаяр гзаф марагълубур я. «Самурди» дуьньядин лезгийрикай гузвай малуматар чна вилив хуьзва. Газет тартибнавай къайдани вижевайди я. Лезги халичаяр хьтин иер, лезги камалэгьлияр хьтин дерин фагьумрин газетди кIелдайди яргъалай вичихъ ялзава.
    Виликай къвезмай юбилейдихъ авсиятда заз икI лугьуз кIанзава: 30 йис са инсандин уьмуьр я. А уьмуьр маналу, чешнелу хьун паталди куьне женгчи журналистри хьиз 1997-йисалай инихъ редакциядин кIвалахдин къайдаяр цIийи хъувуна, газетдив жегьил, алакьунар авай цIийи къуватар агудна. Куьн «Самурдикай» халкьдин ва халкь патал тир, фикирар азаддаказ лугьудай, кIелдайбурун патай ихтибар авай хци ва метлеблу газет авун патал датIана алахъна. Квелай и кар хъсандиз алакьна. Гьавиляй за жуван патай квез разивал къалурзава. 
    Чи хуьрера хайи чIалал газет кIелиз кIанзавайбур авачиз туш. Кесиб тирвиляй абурувай газет къачуз жезвач. Гьавиляй чпихъ мумкинвилер авай ксари хайи хуьруьн агьалияр патал 20-30 газет кхьейтIа, cуваб жеда.
    Газетдин 30 йис жезва, амма чи вилик-кьилик квай бязи ксар уях жезвач. Абуруз я хайи чIал хуьз кIанзавач, я лезгивилин таъсиб чIугваз-вач. Гьикьван гагьди икI жеда? 
    И чар кхьидайла зи рикIел чи сейли къелемэгьли, са шумуд йис вилик «Дагъустандин халкьдин шаир» гьуьрметдин тIвар къачур Арбен Къардашан 2012-йисуз «Самурдиз» акъудай макъалада кхьенвай гафар хтана: «Самур» газет къенин Азербайжанда акъатун чIехи къимет авай вакъиа я. Ам акъатуни эвелни-эвел Кьулан вацIун эрчIи пата авай, ахпани амай вири лезгийриз чун зурба халкь тирди ва чахъ чи къадим чилер ва чIехи тарих авайди цIийи девирдин шартIара раиж хъувуна ва хъийизва».
    За жуван ватанэгьлийривай ихьтин чIехи метлебар кьилиз акъудзавай газетдив агатун тIалабзава. Чаз фадлай халкьдин трибунадиз элкъвенвай чи милли органдин – «Самур» газетдин къадир жен, хайибур! 
 
Гьасан Алижанов,
Баку шегьер