Азиз къелемэгьлияр, газетдин 20 йисан юбилей кьиле фида лагьайла чаз гзав хвеши хьана. Газетдин юбилей халкь паталди сувар я. Алай йисуз чи халкьди “Лезги газетдин” 90 ва СтIал Сулейманан райондин “Куьредин хабарар” газетдин 80 йисан юбилеяр къейд авуна. Завай а газетрин тарихдикай, абур фейи яргъи ва баркаллу рекьерикай гегьеншдиз рахаз жеда. Авайвал лугьун абурун гъвечIи стха тир “Самур” газетдин 20 йис ятIани, ада 40-50-йисан крар кьилиз акъуднава. Чи тарихар цIийи кьилелай ахтармишзава, литературадинни фольклордин икьван гагьди малум тушир чинар ачухзава. Алай вахтунда “Самур” газет лезги чIалан михьивал хуьзвай ва ам вилик тухузвай виридалайни хъсан женгчи я. Чаз дидедин чIал я газет.
Гьуьрметлу редакция! Жечни Магьачкъалада “Самурдин” са пост туькIуьрайтIа? Ина цIуд агъзурралди лезгияр яшамиш жезва ва куь газет къачуз кIанзавайбурни тIимил авач. Заз жуваз ина “Самур” кхьиз кIанзавай цIудралди лезгияр чида. Чна квез 20 йисан юбилей тебрикзава, мадни чIехи агалкьунар тIалабзава.

Элифхан Садикьов, Магьачкъала