Перизада, гьай гуьзел яр Лезгияр вирина  |  8(267) 2013  |  АЗИЗРИН Севда

    Им халисан лезги мехьер тир. Бакуда ихьтин мярекатри рикI аладарда. “Куьн Альвиядинни Эльдаран мехъерик акун чи эрзиман я” гафар кхьенвай эверун къачурла рикIяй хвеши хьанай чаз.
     Мехъер Бакудин “Мовида” тIвар ганвай мярекатрин кIвале кьиле физвай. Кьве лезги жегьилди - Бакудай тир Альвия Гьасановадини Твердай тир Эльдар Пашаева хизан туькIуьрунин шадвал ийизвай. Свасни чам чи халкьдин дегь чIаварин “Свас гъидай макьамдалди” къенез гьахьайла вирибуруз зуз      акъатнай. Ахпа гадайри чам, рушари свас юкьва туна кьуьлнай.
     РикI ахъайдай са карди мехъерик вирибуруз тарс ганай: сагълугъар лугьудайла свасни чам чпин марифатлувиляй гьар гъилера кIвачел къарагъзавай ва гаф тамам жедалди ацукьзавачир.
    Чи сур чIаварин шад межлисрин гьава авай ина. Жегьил рушари свас юкьва туна кьуьлиз-кьуьлиз “Перизададал” илигайла виридан пIузаррик хъвер акатнай.
  Гзаф йисара “Сувар” ансамблда кьуьлерай, сегьнедай чи мехъеррин адетар теблигъ авунихъ вичин пай кутур Альвиядин мехъер халисан лезги руьгьдивди диганвай. Мярекат ихьтинди хьуник “Суварин” коллективди къуьн кутунвай. Ина ансамблдин вири макьамчияр, маничияр ва кьуьлдайбур авай. Альвиядин иер кьуьлуни лагьайтIа, межлисэгьлидин пагь атIанвай.
    Тек са лезгийриз хвешизвачир. Мехъерик квай маса миллетрин векиларни гзаф шад тир. Абур чпихъ галаз къуьн-къуьне уьмуьр гьалзавай лезги халкьдин къадим адетар акваз гьейран хьанвай.

АЗИЗРИН Севда