Президент хкяда Хабарар  |  9(268) 2013  |  “САМУР”
     2013-йисан 9-октябрдиз Азербайжандин агьалийри республикадин цIийи президент хкяда. Сечкияр демократиядал бинелу яз, азаддаказ кьиле тухун патал вири жуьредин къулай шартIар арадал гъанва. Сечкийриз жуьреба-жуьре тешкилатрин 30 агъзурдав агакьна векилри гуьзчивал ийида. Абурукай 4072 касди вири уьлкведа, 25292 касди чара-чара ра-йонра гуьзчивалда. Гуьзчийрикай 697 кас къецепатан уьлквейрин векилар я.
    Исятда президентвилиз кандидат яз къалурнавай цIуд касди - Илгьам Алиева, Милли Шурадин кандидат тир Жемил Гьесенлиди, Адалат Партиядин векил Иляс Исмаилова, Умуд Партиядин кьил Икъбал Агъазадеди, Алай Девирдин Мусават Партиядин кандидат Гьафиз Гьажиева, Милли Дирчелиш Гьерекатдин Партиядин кандидат Фереж Къулиева, Азербайжандин Демократик Партиядин кьил Сердар Жалалогълуди, Сосиал Демократ Партиядин кандидат Араз Ализадеди, Битав Азербайжандин Халкьдин Жебгьедин Партиядин кандидат Къудрат Гьесенкъулиева ва вичин кандидатвал къалурнавай Загьид Оружа халкьдин патай нуфуз къазанмишун патал мярекатар кьиле тухузва. Чкайрал тухузвай теблигъат югъ-къандивай гурлуди жезва.
     Халкьдиз гьихьтин президент кIанзаватIа виридаз ашкара я. Азербайжандин президент уьлкведин аслу туширвал хуьз жедай, Къарабагъдин къал ислягьвилелди гьялиз алакьдай, демократия мадни виликди тухвана, агьа-лийрин дуланажагъ хъсанардай кас хьана кIанзава. Гьа ихьтин регьбер хкягъун патал халкьди сечкийра мукьувай иштиракна кIанзава.