Россиядин ИА-дин академик, РАН-дин Фи-лософиядин Институтдин директор, вич Дагъустан-дин Алкьвадар хуьряй тир Абдусалам Гьуьсейнова вичин 75 йисан юбилей къейд авуначтIани, адан ватанэгьлийри и сейли алим рикIелай алуднач. СтIал Сулейманан райондин кьил Нариман Абдулмуталибова районэгьлийрин тIварцİелай ракъурай телеграммада икI кхьенва: «Играми Абдусалам Абдулкеримович! Вуна - дагъвидин хци, машгьур алимар ва диндин регьберар тир Мегьамед Ярагъвидин ва Гьасан-Эфенди Алкьвадарвидин несилдин векилди хьиз маналу уьмуьр гьална, илимдин кукIушар рам авуна. Чна валди рикIивай дамахзава, вун халкь паталди чİехи камалдинни ялавлу ватанпересвилин, зурба кьегьалвилин чешне я.»