Гатфарин гуьлуьшан йикъара дуьньядиз атанвай, чпин уьмуьрдизни алакьунриз Яран нурар гецифнавай къелемэгьлияр чахъ са акьванни авач. Абурун кьула махсус чка кьунвайбурукай сад чи тIвар-ван авай журналист, 1999-йисалай «КцIар Qusar»  гaзетдин редакторвиле кIвалах-завай Видади Севзиханов я.

1954-йисуз КцIар райондин къадим Яргун хуьре дидедиз хьайи Видадиди гьеле юкьван мектебда кIелдай йисара гъиле къелем кьуна кхьинриз майилвал къалурнай. Ингье адан мурадри цуьк акъудна. Мектеб акьалтIарна, 1972-йисуз Азербайжандин Гьукуматдин Университетдин журналистикадин факультетдик экечIай Видадиди са куьруь вахтундилай вичин макъалайрални очеркралди кIелзавайбурун патай гьуьрмет къазанмишна. Адан алакьунриз сифте яз лайихлу къимет гайи чи машгьур кхьираг Эмир Мустафаева гьахълу яз кхьенай: «Видади Севзи-ханов вичин журналист фагьумдалди вакъиайриз вири патарихъай авайвал къимет гуз алакьдай, гьар са макъала кIелдайбурув абурун рикIяй тирвал, марагълудаказ агакьардай къелемэгли я. И кар патал лагьайтIа, журналистди йифиз-юкъуз лежберди хьиз зегьмет чIугвазва».

      Зегьметдал рикI алай журналистдихъ маса кьетIенвилерни ава. Абурукай са шумуд рикIел тахкана жедач. Сад ла-гьайди, Видади кIелдайбурун вилик жавабдарвал гьиссдай къелемэгьли я. Гьавиляй ам ара датIана вичин чирвилер артухариз алахъзава. Чи къелемэгьли, лезгийрин, Азербайжандин ва къецепатан уьлквейрин литературани журналистика хъсандиз чидай ксарикай сад я. Кьвед лагьайди, ада гьар са месэладиз авайвал къимет гуда, вичин гаф чинал лугьуда. Пуд лагьай кьетенвал адан тешкилатчивилин алакьунар я. ИкI тирди Видадиди редакторвиле кIвалах-завай йисара субутна. 1999-йисуз ам «КцIар Qusar»  газетдин редакторвиле хкягъайла редакциядин гьалар гзафни-гзаф агъуз тир. Техника куьгьне хьанвай, гереклу кадрияр авачир. Газет кхьизвайбур лап тIимил хьанвай. Са гафуналди, Видадиди лугьуз тежедай кьван четин месэлаяр гьялна кIанзавай. Ингье гьялиз алакьна адалай и месэлаяр. Герек тир техника, компьютерар къачуна редакциядиз, цIийи темаяр, цIийи нефес гъана газетдиз. «КцIар Qusarдин» метлеблувал, тираж, гьакIни кIелдайбурун патай гьуьрмет хкаж хьана. Четин вахтара гьа ихьтин крар кьилиз акъудайвиляй В. Севзиханов чи журналистикада «КцIар Qusar» газет кIвачел ахкьалдарай редактор хьиз амукьда.

      Гьукуматди адан зегьметдиз чIехи тир къимет гана. Азербайжан Республикадин Президент Илгьам Алиеван серенжемдалди Видади Севзиханова 2010-йисуз «Азербайжан Республикадин лайихлу журналист» гьуьрметдин тIвар къачуна.

Вич 2000-йисуз Бакуда чапдай акъудай «Уьмуьрар, легьзеяр» ктабдин автор тир Видадиди алай вахтундани и рекьяй ара датIана кIвалахзава. 

      «Самур» газетдин коллективди уьмуьрдин 60 йисан гатфар алукьнавай чи къелемдин дустуниз рикIин сидкьи-дай юбилей тебрикзава ва цIийи агалкьунар тIалабзава.

 

«Самур»