КцIар райондин Шагь дагъдин ценера экIя хьанвай къадим ва иер хуьрерикай тир Кичанда хкажнавай и мискIиндихъ чIехи тарихар ава. Вичин архитектуради Кцİар райондин муькуь хуьрера авай  къадим мискIинрихъ галаз кьазвай и муьжуьд пипIен дарамат са береда гзаф рикI алаз ва фирягьдиз эцигнай. Аниз капI ийиз къунши хуьрерайни инсанар къведай. Хуьруьн кьуьзуьбуру ам советрин девирдилайни вилик эцигнавайд я, адакай гьа са вахтунда медреса хьизни менфят къачузвайди тир лугьуда.

     Совет гьукумат  туькIуьрайла мискIин гьамбарханадиз элкъуьрнай. Ингье хуьруьн вилик-кьилик квай ксарин тIалабуналди 1957-йисуз мискIиндин дараматда Кичан хуьруьн ктабхана арадал гъанай. А чIавуз хуьруьн агьалийрин кьадар 551 кас, ктабханадикай менфят къачузвай кIелзавайбурун кьадар 145 кас тир. 2012-йисан 1-ноябрдиз ктабхана Ясаб хуьруьн ктабханадихъ галаз галкIурнай, ктабрин фондни гьаниз куьчарнай (Себеб хьиз агьалийрин кьадар 1980 кас, кIелзавайбурун кьадар 145 кас хьанвайди къалурнай).

     Ингье къе кичанвияр мискIиндин дарамат гуьнгуьна кухтунин къайгъуда ава. Вучиз лагьайтIа мискIин авай хуьре берекатни жеда, гъвечIи-чIехидаз гьуьрметни. Хуьруьн кьакьан пелел хкажнавай и дарамат цIийи кьилелай Аллагьдин кIвализ элкъуьрун патал абуру алахъунар ийизва. Хуьруьн агъсакъал Аслан Ягьяева лагьайтIа, ам гьукуматди хуьзвай тарихдинни медениятдин дараматрин сиягьдик кутун патал шумуд йисар я талукь тешкилатриз чарар ракъуриз. Республикадин Медениятдин ва Туризмдин Министер-стводи и кар хиве кьунва ва мискIин гуьнгуьна хтун мукьвал йисарин пландик кутада лагьана гаф ганва. Ингье и кар гежел вегьена виже къведач, вучиз лагьайтIа йисари вичин кар аквазва. Гьавиляй райондин талукь тешкилатри и кардик къуьн кутуна кIанда. Гьар хуьруьхъ вичин  рикI алай са чка жеда. Кичанвийрин дамах тир мискIиндиз цIийи уьмуьр хъугун виридан буржи я.