Газета Самур

Туьркиядин лезгийрин сувар
Лезгияр вирина | 5(276) 2014

Алай йисан 21-майдиз Туьркиядин Балыкесир райондин лезги Ортажа (Кирне) хуьре нубатдин «Хийир» мярекат кьиле фена. Ина фадлай лезгийрин сувариз элкъвенвай и мярекатдин юкъуз вишералди чи ватанэгьлийри мад гъилера хайи чIалаз, чи милли адетризни ацукьун-къарагъу-низ икрамзавайди субутна. Мярекат гзаф гурлуди, рикIел аламукьдайди хьана.

Шикилар ягъайди Осман Гечмез я.

Туьркиядин “Balıkecir Dağıstan Kültür ve Yardımlaşma Derneği” кIватIалдиз регьбервал гузвай Жевдет Йылдызаз

Играми Жевдет стха!

Гзаф йисар я куьне йиса садра санал кIватI хьана диде ватан рикIел хкиз, чIехи дидейринни бубайрин руьгьериз дуьаяр кIелиз, игьсанар пайиз. Чи халкьдин тарихдин рикIелай тефир, залан кьисметдин мад са чин кхьин - Шейх Шамилан женгерилай кьулухь ватандивай къакъатна гъуьрбатриз акъатун, Туьркияда бине кутун квез несиб хьана. Квез - 154 йис инлай вилик Дагъустандай катиз мажбур хьайи ксарин веледриз гъурбатдин туькьуьл дад хъсандиз чидa. Ингье куьне дарвилеризни четинвилериз килиг тавуна лезгидин тIвар вине кьуна, дидед чIал, халкьдин адетар, ацукьун-къарагъун кьегьалвилелди хвена, къени хуьзва.

Шумудни са йисар тир чал Туьркиядин лезгийрикай хабарар хъуьтIуьн рагъ хьиз кьериз-цIаруз ага-кьиз. И хабаррин арада “Dağıstan ve dağıstanlılar” кIватIалди кьиле тухузвай мярекатрин суракьарни авай. А хабарри чахъ лувар кутадай. Ингье чун Туьркиядин лезгияр акунихъ цIигел тир. Яраб абуруз дидедин чIал чизматIа, яраб чи адетар хуьзматIа? - лугьуз веревирдер ийидай чна. Эхиримжи йисара дуьньяда хъсан патахъ кьиле физвай демократиядин дегишвилер себеб яз, гьакIни интернетдин куьмекдалди чаз чун генани мукьувай чир жезва. 2008-йисуз Балыкесир вилаятдин Ортажа (Кирне) хуьре кьиле фейи Хийир межлис, Туьркиядин чара-чара пипIерай иниз атанвай лезгийрияр акурдалай кьулухъ чун гъавурда акьуна хьи, куьн жуван тIварцIелди рикIивай дамахзавай халисан лезгияр я.

Жевдет стха! 20 йис я куьне кIватIалдиз регьбервал гуз. Куьне ва Туьркиядин куьн хьтин вилик-кьилик квай лезгийри чи ватанэгьлияр сад-садав агудзава, абурун рикIери ватан кIанардай, хайи чIал кIанардай гьиссер кужумиз тазва. Мурадар кьилиз акъуддай нуьсрет гурай квез Аллагьди. Квез чандин сагъвал, рикIин шадвал, руьгьдин кьакьанвал тIалабзава чна.

С. Керимова,

«Самур» газетдин кьилин редактор