Къебеле  райондин  ЦIийи  Дизахлы  хуьруьн  А. Регьимован  тIварунихъ  галай  юкьван  мектебда  гьа  ихьтин   тIвар  ганвай   мярекат  кьиле  фена. Дидед  чIалал  рикI алай ксар  чIехи  шанкьунивди аниз  кIватI   хьана.

    Мярекат ачухарай  мектебдин  лезги  чIалан   муаллим   Айтекин Бабаевади А.Фетягьан «Лезги  чIал»   шиир кIелайдалай кьулухъ   мектебда    дидед  чIалаз  талукьарнавай   няни сад лагьай гъилера кьиле физвайди  къейд  авуна.  Ахпа  гаф  мектебдин   директор  Мирземмед Мирзелиеваз гана. Ада  мярекат арадал гъайибуруз вичин  разивал  къалурна. Муаллимрикaй    Айгуьн  Хидировади,   Нарынгуьл  Ферзалиевади, Наринж  Аюбовади,  Жейран Регьимовади,     Маариф Регьимова дидед чIалакай авур ихтилатар виридан рикIяй хьана. Абуру  дидед  чIалан нянияр адетдиндаз элкъуьрун тIалабна.

«Гила аялрин гьуьжетунар кьиле фида», - лагьана А.Бабаевади. «Алпан» ва  «Бубу»  командаяр вилик экъечIна. ЧIалакайни  литературадикай туькIуьрнавай суаларни жавабар гзаф марагълубур тир.

     Ахпа аялри шииррални  манийрал илигна. Къумру  Къадировади, Диана  Мирзеевади, Айшен  Аюбовади  «Дидед  чIал», «Пейкер баха»  манияр,  Эфсане  Хидировади, Тегьмине  Камиловади, Жале  Эмираслановади ва Алина  Бабаевади  «Лезгинкадал  илига»  манияр, Ламие  Хасиевади  З.Ризванован      «Дидед  чIалан  гуж», Селми  Къадировади  А.Саидован  «Лезги  чIалан  аламатар», Гуьлай Аллагьвердиевади ва Эсли Ферзалиевади  С.Керимовадин «Лезги тIварцIин экв», Жале  Аширалиевади  Ф.Нагъиеван «Сагъ я лезги халкь», Гуьлай Аширалиевади М.Агъадин «Дидед чIал» шиирар  кIелна.

     МискIалар лагьана абуруз   жавабар къачур,   хуралай  бубайрин  гафар,  хкетар лагьай    аялрин алакьунар акур муаллимриз гзаф хвеши хьана. Са гафуналди, чIехибурни, гъвечIибурни мярекатдилай рази амукьна.

Эйзенгуьл  Аширалиева,

Къебеле  райондин ЦIийи  Дизахлы  хуьр