Са чIавуз вири Азербайжандиз сейли тир Ивановка хуьре гила тежер хьтин вакъиаяр кьиле физвалда. Никитинан тIварунихъ галай колхоздин са шумуд варз инлай вилик хкянавай цIийи седри Николай Дубровина садални алукь тавуна вичиз кIандай къанунар кардик кутунва кьван. «Шаркь» газетди (2014-йисан 5-август) кхьизвайвал, ада и хуьруьн урус тушир агьалийриз – азербайжанвийризни лезгийриз югъ гузвач. И   агьалийрикай девед хъел кваз рахазва. И касди азербайжанвийриз «къураба» тIвар гана, абурун ихтиярар чIурзава, абуруз кIвалахдай, кьил хуьдай мумкинвал гузвач. Ада хуьруьз «къурабаяр» татурай лугьуз, чкадин урусрин кIвалер маса гун къадагъа авунва. ЦIийи седриди гьакIни азербайжанвияр цикай магьрумарнава.

     Газетди кхьизвайвал, Николая алай вахтунда хуьруьн зур пай тир лезгийризни басрух гузва. Адаз хуьруьн майишатдин лезгияр машгъул жезвай хел - хипехъанвал терг авуна, вакIарбанвал вилик тухуз кIанзава. ИкI хьайитIа, лезгиярни Ивановкадай маса чкайриз куьч жеда кьван. Яраб цIийи седридилай хуьруьн зур пай тир лезгияр инай акъудиз алакьда жал? Вич Ивановкадай тир са кьуьзуь лезгиди хъсандиз лагьанва: «АкI акъатзава хьи, седриди азербайжанвийризни лезгийриз гьахъсузвал авуна, гьахъ тIалабзава. Им буьркьуьдаз экв кIан хьун я.» Буьркьуьдаз экв кIанзаватIа, мад вуч лугьун?

 

«Самур»