"Самур" - 20  |  10(245) 2011      

И йикъара чи республикадин агьалийри Азербайжандин аслу туширвилин 20 йисан юбилей гзаф гурлудиз къейд авуна. Алатай къад йисан къене гьикьван кIевера гьатнатIани чи республикади халкьдин тарихда виридалайни чIехи агалкьун тир вичин аслу туширвал хвена, мягькемарна ва мадни вилик тухвана. Уьлкведин аслу туширвал арадиз хкун патал дуьньядиз сейли чIехи сиясатчи, вири миллетдин лидер Гьейдар Алиева чIугур зегьметар иллаки чIехиди ва бегьерлуди хьана. Ада Азербайжан са шумуд чкадал пай хьуникай, чукIуникай хвена. Къарабагъдин къал ислягьвилелди гьялун патал дяве акъвазардай икьрар кутIунна. ЧIехи регьберди Азербайжан экономикадин рекьяй вилик тухун, къудратлу гьукуматдиз элкъуьрун патал нафтIадин стратегия гьазурна кардик кутуна. Къецепатан гьукуматрихъ галаз кутIунай нафтIадин икьрарри Азербайжан вири дуьньядиз сейли авуна.
ЧIехи сиясатчидин рехъ адан хци, Азербайжандин гилан Президент Илгьам Алиева лайихлудаказ давамарзава. Алатай къад йисан къене Азербайжан экономикадин рекьяй гзаф вилик фена. И йисара чи республикадин нафт-газ сектордиз 44 миллиард инвестиция серфнава. И рекьяй чи республикади къецепатан уьлквейрин кампанийрихъ галаз 32 икьрар кутIуннава. Алай вахтунда чи нафт дуьньядин 33 уьлкведи къачузва. SOCAR цIийи  проектар кардик кутаз алахъзава. Гьабурукай яз гимияр расдай цIийи завод, Сумгаитда карбамиддин завод, Бакудин Къарадагъ районда нафт-химия ва газдин комплекс кардик кутун къарардиз къачунва.
Уьлкве майишатдин маса хилерайни вилик физва. И кар субутун патал алай йисан 9 вацран къене къазанмишнавай са бязи агалкьу-нар къалурун бес я. И вахтунда тек са эцигунриз 7,6 миллиард манат пул серфнава. Санлай яшайишдин чка 1 миллионни 351,2 агъзур квадратметр тир кIвалер, 3424 аял патал цIийи мектебар, шумудни са поликлиникаярни азарханаяр, Бакуда цIийи метродин станция, диагностикадин меркез, Товузда некIедин завод, олимпиядин комплекс, Абшерон районда мебелдин фабрика, AZDMF завод, Агъжабедида некIедин завод, некIедин магьсулрин комбинат. Имишли районда емдин фабрика, набататрикай гъери хкуддай фабрика, олимпиядин комплекс, Хачмаз районда конденсаторрин завод ва маса карханаяр, Къуба районда шагьматдин мектеб, гьакIни маса районра шумудни са карханаяр эцигна кардик кутунва.
Гьа ихьтин агалкьунар себеб яз агьалийрин дуланажагъни къвердавай хъсан жезва. Уьлкведа демократия вилик физва. Азербайжан-дин Президент Илгьам Алиева Къарабагъдин къал ислягьвилелди гьялун патал ара датIана алахъунар ийизва. Са гафни авачиз, гележегда Азербайжанди эрменийри чапхуннавай чилер вахчуда, Къарабагъ чапхунчийрикай азад ийида. Дуьньядин уьлквейрин жергеда Азербайжанди аслу тушир, азад, демократиядинни экономикадин рекьяй вилик фенвай. къудратлу уьлкве хьиз маса гьукуматриз чешне къалурда.