Кьве шаир илифна…
Зарият  |  9(280) 2014      
   И мукьвара чи редакциядиз са юкъуз кьве мугьман илифна.  Лезги чIалал гзаф рикI алай, чи газет кIани, поэзиядал дамахзавайбур я абур.  Сад бегьердив дигана зулун рехи тарциз ухшар  яшлу кас, муькуьди гатфарин цуьк хьтин иер, зериф руш тир. Вичин 77 яшар хьанвай Шакир Наврузбегованни, 20 йиса авай Эсмира Бейбутовадин лезги шииратдихъ ялзавай гьиссерин ялавлувилинни къенивилин ухшарвили шадарна чун.
   Алатай виш йисан 60-йисара КцIара чи сейли камалэгьли Забит Ризванован регьбервилелди арадал атай «КIватIалрик» кваз хайи чIал хуьн патал женг чIугур, Азербайжандинни Дагъустандин газетринни журналрин, гьакIни «Самур» газетдин  чинриз мукьвал-мукьвал вичин шиирар акъатай, икьван гагьди кьве ктаб басма авур Шакир Наврузбегов  КцIар райондин СтIур хуьруьн таладай я. Юкьван мектеб акьалтIарайдалай инихъ хуьруьн майишатдин крарихъ гелкъвезвай, вичин хизандин къайгъу чIугвазвай ада къе вичин къаридихъ галаз санал веледринни хтулрин кьула уьмуьр гьалзава.  Жаван чIавара хьиз къени къелемдилай гъил къачузвач  агъсакъалди. Редакцияда хьайила вичин верцIи ихтилатралди чи коллективдиз хуш легьзеяр 
багъишна ада.
   Эсмира Бейбутова КцIар райондин Хуьрел хуьряй я. Юкьван мектеб акьалтIарнавай ам алай аямдин гзаф жегьилриз ухшар я. Интернетдин чинра вич алай чка чириз, вичин къелемдикай хкатай цIарар лезгийрал агакьарзава ада.  Иервилив къведай викIегьвални ава адахъ.  Поэзиядин къайда-къанунар хъсандиз чириз, вичин чирвилер артухариз алахъзавай и лезги таватдин алахъунар руьгь кутадайбур я. 
   И кьве шаирдихъ мад са ухшарвал ава. Шиирар басма авун патал гъалатIар дуьзарна гьазурун герек тирди хъсандиз чизва абуруз.  «Редакторди гъил элкъуьрай шиирар багъбандин гъил галукьай багъ хьиз жеда» лагьана кьведани.  Гьа и гафарикай хуш атана чаз. Шакир Наврузбегован зулун майвайрин дад какахьнавай, Эсмира Бейбутовадин лагьайтIа, гатфарин цуькверин иер гьуьм квай шиирра дуьшуьш жезвай хъсан фикирар, чкадал лагьанвай цIарар акваз шад  хьана чун. Чи поэзияда вич дуьшуьшдин вакъиа туширди субутнавай агъсакъал къелемэгьлидинни и рекье сифте камар вегьизвай жегьил заридин хкягъай шиирар «Самурдин» чинриз акъудзава чна.
 
Шакир Наврузбегов  
 
Бахт
 
КIвенкIве гьатна залай вилик физва бахт,
Ахгакьиз кIанз зверзава зун гуьгъуьна.
Гагь куькIвена зи уьмуьрдал вун, зи бахт,
Гагь туьхуьдай зи фикирар къекъвена.
 
Белки зи бахт, вун ракъина авайтIа,
Адан нурар зи къужахдиз ахъайиз.
Чуьнуьх хьана дагъдин кьулухъ галайтIа,
Йифериз къвез гимишдин руг акахиз.
 
Заз акI жеда вун заз табий тахьана,
Фад атана кьадай хьиз зи хъуьчIуькай.
Зи шиирриз тагакьай нур хгана,
Хабарар кьаз къведайди хьиз рикIивай.
 
Я чан зи бахт, чара хьана, гьич катмир,
Вун акъваздай легьзени заз такурай.
Зи мажалсуз уьмуьрдивай къакъатмир,
Вахтни, бахтни зи гьаятда къекъуьрай.
 
ХъуьтIуьн хиялар
 
Къуьрен хам хьиз, гьакьван хъуьтуьл, кьезилдиз,
Жив ацукьна аста-аста чилерал.
ЦIарцIар гузва къаш кутур хьиз къизилдик
ЦIерепIари, рагъ акьурла путварал.
 
Сифтегьан жив, вун иер я шикил хьиз,
Ви нефесни чанда гьатда хъуьцIуьдик.
Булахарни лацу севрен вилер хьиз,
Хъиткьинзава живед юкьва вилидик.
 
Лацу хьанва хупI кIвалерин чIереяр,
Къушари хуьз къал къачунва къаварал.
Живед кьунва элкъвез-элкъвез дереяр,
Галат тийиз, санбар кьазва цаварай.
Гьа икI гила кьуьд гьахьзава къувада, 
Кьамараллаз къугъваз жеда аялар.
Дагъдин кукIвал лекь элкъвезва гьавада,
Ийиз  хъуьтIуьз чими гатун хиялар.
 
Са шиир це заз
 
Са шиир це заз,
За низ минетда,
Варз алай йифер къужахда кьуна.
Гьеле уьмуьр зи ама лезетда,
Алатна фимир, ваз зун такуна.
 
Са шиир це заз,
За низ гьуьрметда.
Къе зи яйлахда амазма цуьквер.
Я руш, зи шиир, вун я гьелбетда,
Алатна фимир сивик галаз хъвер.
 
Са шиир це заз, 
Квадармир адет.
Кварни къуьнухъ кваз ша вун булахдал,
За ваз хкажда шииррин гуьмбет,
Ашукь я зун ви иер дамахдал.
 
Са шиир це заз,
Михьи шагьвар квай.
Чими мурадар къайи тахьурай.
Вири шадвилер зи чанда авай,
Дидедин нек хьиз ваз гьалал хьурай.
 
Са шиир це заз,
АцIура зи рикI.
Михьи легьзейрив берекат галай.
Вун галачиз за уьмуьр гьалин гьикI,
Туьхъуьнни нефес чанда рикI авай?
 
Са шиир це заз,
Гьуьл хьиз динж тушир,
Гагь лепе авай, гагьни мили хъвер,
Закай чуьнуьхмир ви рикIин жигъир,
ЧкIин тийирвал илгьамдин муькъвер.
 
Эсмира Бейбутова
 
Зун хиялри туханва
 
Зи ватандин цавара,
Лув гузвай са лекь я зун.
Чи Шагьдагъдин ценера
ЭкъечIнавай векь я зун.
 
Ватандикай фагьумиз,
Фида ширин хиялриз.
Адан экуь югъ акваз,
Хвеши жеда аял хьиз.
 
Гагь-гагь кIанда цавара
Гъил ахъайна, лувар хьиз,
Къушари хьиз, цавай физ, 
Теменар гуз ватандиз.
 
Гагьни кIанда, акъатиз,
Дегь чIавариз аватиз.
Хъсанбурув агатиз,
Писбурувай къакъатиз.
 
Лув акатна рикIи икI,
Зун яргъариз тухуда…
Зи зар алай хиялриз
«Бахтлу я вун» лугьуда.
 
 
Лезги рушар
 
Демин къерех рушар ацIай – 
Са гатфарин цуьквер хьиз я.
Гьар са рушан чинавай хъвер.
Ракъинив гвай эквер хьиз я.
 
Яру, къацу, вили пекер
АлукIнавай сунайриз кьий,
Къуй гьар са руш вичиз кIани,
Вични кIани са ярдиз фий.
 
Лезги хуьруьн мел-мехъеррин
Дамах я куьн, лезги рушар.
Чи гадайри куь гьунаррихъ
Кутада къуьн, лезги рушар.
Хиялар
КIватIал хьана, цавар 
кьунвай цифер хьиз,
Зи рикIивай къакъатзава, хиялар.
МичIи жезва, варз алачир йифер хьиз,
Яргъаризди акъатзава, хиялар.
 
Къайи хьраз ифин гузвай цIукар хьиз,
Къайи рикIив агатзава, хиялар.
ЧIутхардикай куьрсар хьанвай 
муркIар хьиз,
ЦIраз са-сад аватзава, хиялар.
 
Дидед  чIал
 
Хайи гафар ахъа жеда цуьквер хьиз,
КIанида кьван вуч я жуваз дидед чIал.
Гьахьда рикIе ам ракъинин эквер хьиз,
Чи мецерин верцIи аваз, дидед чIал.
 
Вегьиз жедач кьилел алай бармак хьиз,
Кьакьан дагъдин тик кукIуш 
яз дидед чIал.
Мегъуьн тарцин дувулар хьиз алахъда,
Хайи чилин деринар кьаз дидед чIал.
 
Чи хиялрин муг, вилерин нур я вун,
Шарвилидин эменни чаз - дидед чIал.
Дегь суракьар гва, сур я вун,
Мадни пара уьмуьр гуй ваз, дидед чIал.

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Жемиладин ван Öyünməli məktəb Заокеанская музыка в Кусарах Сырные гонки
Статьи из этой рубрики
Мад са инжи Цавариз хкажайтIа чIал М.Ю.Лермонтов – 200 Азизан Алем Заридиз талукьарнавай няни
ЦIИЙИ ТИЛИТ
№: 7(312)
август, 2017

Скачать PDF

РУБРИКИ

ПОЛЕЗНОЕ