Вилик финин чешне
Хабарар  |  11(282) 2014      
     Регионар вилик тухун патал кардик кутунвай III Гьукуматдин Программадив кьадайвал, чи республикадин чара-чара ра­йонра лугьуз тежедай кьван чIехи дегишвилер кьиле физва. ЦIийи эцигунри ва абадвилери рикI шадарзава. И рекъяй агалкьунар къвердавай пара жезва. Агъа­дихъ чна Къуба, Хачмаз, Къебеле ва Балакен районрин цIийи агалкьунрикай куьрелди чирвилер гузва.
 
Къуба
 
     Чи уьлкведин къадим маканрикай тир Къубада кьиле физвай цIийивилери кьве жигьетдай чпихъ ялзава. Районда эцигунриз ва рекьер кутуниз кьетIендиз фикир гузва. Куьруь вахтунда ина А. Бакиханован тIварунихъ галай тарихдин музей патал дарамат, Жегьилрин КIвал, банкдин ва суддин сад-садалай иер дараматар эцигна кардик кутунва. Алай вахтунда Къубада кьакьан кIвалер, райондин азархана патал корпусар, хуьруьн майишатдин ва набабатдин меркез, са шумуд мектеб эцигзава. Хъимил къишлах хуьре 220, Афуржада 120 чкадин мектебар эцигна куьтягьзава. Эспарасти ва Мескехаже хуьрерин гьар сада 180 аялди кIелдай мектебрин дараматар хкажзава. Виликай къвезмай йисуз Эрмеки, Алиж Дигагь, Иснов, Чартепе хуьрера ихьтин чирвилерин карханаяр эцигда. 
     Районда и йикъара 7 хуьруьн агьалийриз къуллугъзавай Къуба-Куьпчал-Куьснет рехъ кардик кутуна. Адан яргъивал 23 километр я. Исятда 12 хуьр галкIурзавай Рустов-Ханагагь-Гирдагь, Рустов-Нуьйдуьн-Шудукъ, Рустов-Мескехаже, Рустов-Багъчали-Екдар рекьер кутазва. Къуба-Къунахкент-Шамахи рехъ кутунихъ авсиятда крар давамарзава.  
 
Хачмаз
 
     Са береда къайгъударвиликай яргъал тир Хачмаз гила лугьуз тежедай кьван дегиш хьанва. Кьиляй-кьилди абад хьанвай иниз паркарин шегьер лугьузва. Шегьердин вири куьчеяр гуьнгуьна хтунва, цIийи паркар арадал гъанва. Ченлибел паркда кардик кутунвай 19 метрдин кьакьанвиле авай «Гъуьлягъ дагъ» комплексди, ТIаратIдин майданди, ТIаратIдин музейди, 52 гуьмбет авай «Кьилдин ксарин музейди» ва маса эцигунри гила Хачмаз вириниз сейли авунва.
Эхиримжи цIуд йисан къене ина 20 офисдин дарамат, 33 цIийи мектеб, са шумуд бахча эцигнава. 1000 аялди кIелдай 6 мектеб, 120 чкадин бахча ва маса дараматарни эцигзава. Санайи ва хуьруьн майишат вилик тухун патал 9 гьамбарханадин комплекс, 10 шуьмягъар гьасилдай кархана эцигнава. Идалай гъейри районда 5 къушчивилин, 7 техилчивилин майишатар, 3 чимихана кардик кутунва. ЦIийи багълар кутурдалай кьулухъ райондин багъларин чилер 13337 гектардив агакьна.
 
Къебеле 
 
     Исятда Азербайжандин виридалайни вилик фенвай районрикай сад яз гьисабзавай Къебеле туризмдин рекьяйни сейли жезва. Эхиримжи йисара ина туристар патал шумудни са ял ягъидай дараматар эцигнава. «Qafqaz Recort», «Qafqaz Riverside», «Qafqaz Sport» хьтин мугьманханаяр иллаки тай авачирбур я. 
     Алай йисан эвелра ина «Tufandağ» Кьуьд-Гад Туризмдин Ял Ягъидай Комплексдин сад лагьай этап кардик кутурдалай кьулухъ райондиз къвезвай туристрин кьадар кьведра пара хьанва. Комплексда 4 яцIу цIилин рехъ кутунва, 10 гъелеррин рекьикай 5 рехъ кьиляй-кьилди гьазур я. ХъуьтIуьн варцара туристри и рекьерикай менфят къачуда. Алай вахтунда яцIу цIилин рехъ физвай Дуружа хуьре цIийи мугьманхана ва живедин гьавиз эцигзава. Виликай къвезмай йисара Къебеледин комплексди чи уьлкведа дагъдин туризм вилик тухунин кардик лайихлу пай кутада.
 
Балакен 
 
     Вич 2014-йисан «Азербайжандин Фольклордин Меркез» яз хкянавай Балакенди эхиримжи йисара агъзурралди туристар вичихъ ялзава. Алатай кIуьд вацран кьене иниз 20 агъзурдалай гзаф туристар атанва. Районда кьиле фенвай дегишвилери гьам чкадин агьалийрин, гьамни мугьманрин рикI шадарзава. Шегьердин гзафни-гзаф чIехи ва абад паркда 1200 метрдин яргъивиле яцIу цIилин рехъ кардик кутунва. Меркезда эцигнавай шегьидрин комплексди, цIийиз кутунвай «Ветеранрин багъди» вири гьейранарзава.
     Районда мектебар ва бахчаяр эцигунин кардиз иллаки хъсандиз фикир гузва. Шегьерда, гьакIни Талалар, Гайса, Шериф хуьрера ва маса чкайра эцигнавай мектебра ва бахчайра вири жуьредин къулайвилер арадал гъанва. Исятда Шамбул ва Сарыбулах хуьрера ихьтин эцигунар тухузва.
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я "Сувар" приглашает Алакьунар авай аялар Müəllimiİmə İthaf Mənəviyyat polisi vacibdir
Статьи из этой рубрики
Гьар ктаб са вакъиа я Туризм вилик тухузва Низами Генжеви виринра Давосда чIехи мярекат Къафкъаз чирдай институт
ЦIИЙИ ТИЛИТ
№: 9(314)
октябрь, 2017

Скачать PDF

РУБРИКИ

ПОЛЕЗНОЕ