Решадан шегьре рехъ
Харусенят  |  1(284) 2015      
     Интернетда авай чи сайтиниз гьар юкъуз цIудралди чарар къвезва. Гзафбур зариятдиз, харусенятдиз талукьбур я. Чара-чара ктабрикай, кьилди шииррикай, манийрикай ихтилатда садбуру. Гагь-гагь «Самур» газетдихъ, «Сувар» ансамбл­дихъ авсиятда веревирдерни ийида.
     Алай-алайдал туна, и чарар кIелунив эгечIда чун. Вучиз лагьайтIа кхьизвайбурун фикирар, абурун теклифар бакардиз къведайбур я. Чар кхьиз гьар садалай алакьдач, жуван фикир-фагьум куьрелди къелемдиз къачун патал дуьньякьатIунар, савадлувал, кьетIендаказ гаф лугьуз жедай алакьунар герек я. Авайвал лагьайтIа, и чарари гьам «Самурдин», гьамни «Сувардин» крар гуьнгуьна хутаз чаз гзаф куьмек гузва.
     «Сувар» ансамблдин маничийрикай кхьенвай чарарни къачуда чна. Ингье са бязи чарар Решад Ибрагьимовакай я. А чарарай цIарар:
     «Лезги манияр Решада акьван пешекарвилелди лугьуда хьи, жуван халкьдал, жув лезги хьунал дамахда вуна.»
     «Аданди гекъигиз тежер ван я. Тух жедач вун и ванцикай.»
     «Решада классикадин эсерар вичиз хасдаказ лугьуда. Анжах лезги чIалал ада мани лугьун са куьнивни гекъигиз жедач. Адав къведайбур тIимил ава. Гьалал хьурай вичиз.»
     Решадан манияр сад-сад тупIалай ийизвайбурни ава. Садбуруз адан «Зи халкь» манидикай, муькуьбуруз «Жедайди туш», са масабуруз  «Самур» ва маса манийрикай хуш къведа. Алибег Агъалиев лугьудай са касди гьейранвилелди кхьизва: «Решадан ванцихъ цIигелбур гзаф ава. Лезгийрихъ ихьтин вини дережадин манияр лугьузвайбур, чи харусенятдин мас хкажзавайбур хьуни рикIивай шадарзава чун.»
     Ихьтин чарари руьгь кутада чахъ. Вучиз лагьайтIа «Сувар» ансамбль вини дережадив агакьунин, адан уьмуьр яргъи хьунин себебрикай сад адав ихьтин сеняткарар агатун я. 
     Решад Ибрагьимов 1981-йисан 7-ноябрдиз Бакудин Гьовсан поселокда дидедиз хьана. Чеб КцIар райондин ТIигьиррин хуьряй тир Гьейбетуллагьани Риясата чпин пуд велед – кьве рушни са гада дидед чIалан къадир чидай халисан лезгияр хьиз чIехи авуна. Решадахъ иер ван авайди сифтени-сифте адан дидеди  кьатIана. Гадади 7 - синифда кIелдай чIавуз ада мектебдин мярекатдал «Kəndimiz» мани лагьайла ана кIватI хьанвайбуру гурлу капаралди чпин гьейранвал къалурнай. Муькуь юкъуз муаллимрин тIалабуналди Риясата Решад Азербайжандин Гьукуматдин Консер­ваторияда чпихъ алакьунар авай аялар патал кардик кутунвай мектеб-студиядиз тухванай. И студияда анжах чара-чара инструментрал ягъизвай аялар машгъул жезвайди чир хьайила дидени бала вучдатIа тийижиз амукьнай. Ингье та­лантдиз Аллагьди рехъ ахъайда лугьуда. Консерваториядин муаллим Аза Сулей­мановади Решадахъ яб акалайдалай кьулухъ, адан тIалабуналди ина вокалдин синифни ачухарнай. А синифда пуд йисан къене тек са аялди – Решад Ибрагьимова чирвилер къачунай. 
     ЦIуд лагьай синиф акьалтIарай же­гьил виридалайни гзаф балл кIватIна консерваториядик экечIайла Решадаз хвешила дуьнья вичиз гайиди хьиз хьанай. Вад йисан къене Азербайжандин халкьдин артист, сейли сеняткар Фидан Кьасу­мовадивай классик музыкадан сирер чириз алахъай Решад са тIимил чIавалай профессоррин ва муаллимрин рикI алай студентдиз элкъвена. КIелунал, зегьмет чIугунал, жуван винел кIвалахунал рикI алай жегьилдин умун, къени къилихри, дуьзвилини михьивили, датIана гьа­хъунихъ гелкъуьни адаз чIехи гьуьрмет гъана. Сенятдин рекье къетIи камар ве­гьей ам са шумуд фестивалдин лауреатни хьана.
     ЧIехи сегьнедиз Решад сифте яз «Сувар» ансамблдихъ галаз санал экъечIна. Консерваториядин IV курсуна кIелзавай и жегьилдихъ лезги чIалал мани лугьудай шанкь авай. Са кар авай хьи, вичин репертуарда дуьньядин сейли классикрин эсерар авай и гадади лезги чIалал сифте яз лугьудай мани рикIел аламукьдайди хьана кIанзавай. Гьавиляй чун санал мани гьазурунив эгечIна. 2006-йисуз Бакудин Р.Бегьбудован тIварунихъ галай Манидин Театрда кьиле фейи адан дебютди «Суварин» жергедиз вичихъ зурба алакьунар авай са тенор атанвайди виридаз малумарна. 
     2007-йисуз Бакудин Шегьрияран тIварунихъ квай Медениятдин Дараматда кьиле фейи концерт «Суварин» виридалайни хъсан концерт хьиз гзафбурун рикIел аламукьна. Агъзурдалай гзаф инсан кьазвай чIехи зал, адан амфитеатр, ложаяр кьиляй-кьилди ацIанвай. Залдай сегьнедиз датIана цуькверин кIунчIар ялзавай. А юкъуз зал пудра Решадан манийри кIвачел къарагъарнай. Абур лезги чIалал «Зи халкь», азербайжан чIалал «Sənsiz» ва италян чIалал «O sole mio» манияр тир.
     Гьеле консерваториядин IV курсуна кIелзавай чIавуз Азербайжандин Гьуку­матдин Хордин Капелладиз солиствиле кьабулай Решада 16 йис я ара датIана и коллективда кIвалахиз. «Суварин» хизанда лагьайтIа, ам 17 йис я аваз. Бакудин виридалайни иер сегьнейрал, гьакIни Москвадин, Петербургдин, Ярославлдин, Магьачкъаладин кьилин сегьнейрал экъечIна инсанар лезги манидин, гьакIни дуьньядин сейли манийрин суьгьуьрда тур Решадан фанатар къе агъзурралди я. 2007-йисуз Туьркиядин TRT AVAZ каналдин теклифдалди адан «Könül bağı» гунугдин мугьман хьайи Решадалай «Сувар» ансамблдин макъамчийрихъ ва солист Эльвина Гейдаровадихъ галаз санал лезгийрин харусенят и уьлкведиз мукьувай чириз алакьнай. Чпин иер ванералди вири суьгьуьрда тур Решадни Эльвина муькуь юкъуз TRT-дин «Gün aydın» экуьнин программада 2 сятдин мугьманвиле хьанай ва абуру 37 уьлкведин килигзавайбуруз чи манияр кIа­нарнай. 
     Вичин «Самур», «Жедай туш», «Зи халкь», «Шарвилидин мехъер», «За семью горами», «Qürbətdən gələn qonaq» хьтин манийралди агъзурралди инсанрин рикIер рам авуна, цIийиз агалкьунрин шегьредиз экъечIайла Решад Ибрагьимов садлагьана сенятдивай яргъа хьанай. Гьа и карди ам чидай, адан ванцел гьейран тир инсанрик къалабулух кутунай. Пуд йисуз ам «Суварив» эгечIначир. Пуд йисуз ада мехъеррик лагьаначир.
     Куьне гьуьлуьз фикир ганани? Ана гагь-гагь гарун гуьгъуьналлаз тIурфан къарагъда, алчуд жез ахъа жезвай лепейри сад-садал гьалч жез къал кьада. Сеняткардин рикIни гьуьл хьиз я. Ана акьван къалабулухар кьиле фида хьи. Ингье тIурфанрин уьмуьр яргъи жедач. Гьар тIурфандилай кьулухъ секинвал, миливал къведа. Решадан рикIе кьил хкажай тIурфанарни элекьна. Пуд йисан чаравал алудна, ам вичин хайи коллективдиз – «Сувариз» хтана, «инаг зи ватан я, ватандин къадир адавай къакъатна яргъариз акъатайла чир жеда», – лагьана гъамлудиз хъуьрена.
     Къе чавай къетIидиз лугьуз жеда хьи, и лирик-драматик тенордив – Решад Ибрагьимовав къведай, лезги манидал ада кьван кIвалахзавай кьвед лагьай маничи авач. Адан гегьенш диапазондин кьакьан ванци Къафкъаз дагъларин гьайбатлувиликайни инин ксарин кьегьалвилерикай хабар гузва. Адан тенордихъ гагь-гагь ахьтин ширинвал какахьда хьи! Иллаки милизмаяр авурла и ванцин махпурри рикI хъуьтуьларда.
     Чахъ бизнесменар авачиз туш. Абурухъ халкь кIани инсанарни ква. Ихьтинбуру Решад Ибрагьимов хьтин сеняткарриз спонсорвалун чIехи суваб я. Жуван вацI жува яцIу авуна кIанда, – лугьуда бубайри. Решадаз спонсорвал авун чи халкьдин медениятдиз аявалун лагьай чIал я.
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
и чил хайи диге я РикIелай ракъурдач Елабугадин дамах “Квахьай йикъарган” кIелайла... Кьилди ктабхана
Статьи из этой рубрики
«Сувар» ансамблдин 20 йис! Дети танцуют «Лезгинку» Заокеанская музыка в Кусарах "Сувар" приглашает «Сувар» вновь поразил зрителей
ЦIИЙИ ТИЛИТ
№: 7(312)
август, 2017

Скачать PDF

РУБРИКИ

ПОЛЕЗНОЕ