Газета Самур

Агалкьунар хьураЙ
Барка | 3(286) 2015

КцIар райондин Кичан хуьруьн тIвар-ван авай сихилрикай гаф кватайла гьасятда Демировар рикIел къведа. Са береда и сихилдай тир шумудни са кас Азербайжандай къецепата вини дережадин чирвилер къачуна, пешекарар хьиз ватандиз хтанай. Ирид хцинни са рушан буба тир Демиран кIел-кхьинал рикI хьуни и хуьруьн инсанрик руьгь кутунай. Адан савадлу веледрин суракьар яргъариз чкIанай.

Кичандал ва масанра кIвалахай, 45 йисан къене хъсан муаллимди хьиз элдин патай чIехи гьуьрмет къазанмишай Мурадхан Залан хва Демировни вичин чIехи буба хьиз элдихъ ялай кас тир. Вичин веледривай хьиз, тарс гайи аялривайни хъсан кIелун, зегьметдихъ агъун тIалабдай ада. Бубадин тарсар хъсандиз кьур адан 9 аялдини институтар акьалтIарнай.

Абурукай садни Зал Залов я. Виридаз вич савадлу ва гьахъ вине кьадай инсан хьиз чидай ам чи республикадин таможнядин тIвар-ван авай кIвалахдаррикай я. Кичандал дидедиз хьана, ина 8-синиф куьтягьай ада Бакудин 1-нумрадин физикадинни математикадин юкьван мектебда кIелнай. 1977-йисуз Азербайжандин Гьукуматдин Университет акьалтIарна, Хачмаза муаллимвал авунай. З.Залован алакьунар акуна ам Хачмазин райкомдиз кIвалахал тухванай. Гьанай ам Москвадиз, вини дережадин партиядин мектебдиз кIелиз ракъурнай.

1993-йисалай полковник Зал Залова Азербайжан Республикадин Гьукуматдин Таможнядин Комитетдин Хачмаз райондин идарадин начальникдин заместителвиле кIвалахзава.

«Самур»дал рикI алай, дидед чIалал акъатзавай и газетдал дамахзавай Зал муаллим адан таъсиб чIугвазвайбурукай я. И мукьвара вичин 60 йис тамам хьанвай Зал муаллим чна рикIивай барка ийизва. Адаз генани чIехи агалкьунар, чандин сагъвал ва рикIин шадвал тIалабзава.