Мукьвара Россияда Милли месэлайрихъ галаз маш­­гъул жедай кьилди идара кардик кутада. Ада мил­ли рафтарвилерин рекьяй гьукуматдин сиясат кьи­ле тухуда. Гила уьлкведин гьар са халкьдиз вичин вилик акъвазнавай месэлаяр гьялун патал тавакъу ийидай чка жеда.

     РФ-дин Гьукуматдин Думади гьасятда цIийи идеядин пад хвена ва кьилди идара герек тирди къейд авуна. Думадин вице-спикер Сергей Неверова ла-гьана: «Рос­сия гзаф миллетринни гзаф динрин ватан я. Гьавиляй ина милли месэлаяр вахтунда ва дуьздаказ гьял авун, халкьарин арада авай рафтарвилер генани хъсанарун чарасуз я. И кардив гьукумат ва ичтимаият ара датIана машгъул хьана кIанзава. Милли месэла гзаф муракаб ме­сэла я. Гьавиляй адахъ галаз чара-чара департаментар ваъ, кьилди, аслу тушир, анжах гьукуматдин чIе­хидаз табий тир идара машгъул хьун герек я.»

     Дагъустандай Совет Федерациядиз хкянавай сенатор, вице-спикер Иляс Умаханова лагьайвал, Россия хьтин гзаф миллетар ва динар авай уьлкведа ихьтин ида­­ра фадлай хьана кIанзавайди тир. ЦIийи идаради чара-чара халкьарин вилик акъвазнавай месэлаяр гьялун патал герек тир вири жуьредин алахъунар ийида.

     Арадал гъизвай карханади гьукуматдиз вири хал-кьар патал сад хьтин кутугай сиясат кьиле тухуз куьмек гуда. Регионра адан чкадин тешкилатар кардик кутада. Санал къачурла, идаради гьам миллетрин, гьамни диндин арада алакъаяр мягькемарунин карда чIехи тир роль къугъвада. Ада гьакIни уьлкведин халкьар патал цIийи программаяр гьазурна кардик кутада, чкайрал милли сиясат гьикI кьиле тухузватIа гуьзчивал ийида. 

     Россиядин президент В.Путина цIийи идарадихъ авсиятда гьукуматдиз тапшуругъар ганва. Идара мукьвара кардик кутада.