Санкт-Петербургдин «Кино ОКО» студияди «Къуншидиз кIанивилелди мугьмандиз фин - лезгияр» тIвар ганвай фильм чIугунва. Фильм Дербентда, Ахцегьа ва Къурушдал чIугунва. Ина а шегьеррикайни хуьруькай, анра яшамиш жезвай лезгийрикай гегьеншдиз малуматар гузва. Лезгийрин адетриз, медениятдиз, тарихдиз, макьамриз, халкьдин сенятриз, халичачивилиз, цIун кIвализ, кьилди хьраз ва хьран кIвализ талукьарнавай сегьнеяр гзаф марагълуз чIугунва.

     Фильм тирвал лезгийрикай, абурун чилерикай, алакьунрикай ихтилатзавайди машгьур журналист Анастасия Барашкова, адаз куьмек гузвайди гзаф йисара Дагъустандин халкьдин депутат хьайи, Дагъус­тандин лайихлу духтур, медицинадин илимрин кандидат Нариман Рамазанов я. Гьа са вахтунда чеб духтурар тир Н.Рамазанован уьмуьрдин юлдаш Элмира Рамазановади, хва Мурад Рамазанова, Дербентдин Гьукуматдин Тарихдинни Архи­тектурадин Музей-Къурухдин ди­ректор Али Ибрагьимова, Ахцегьин музейдин директор Агьмед Дагъларова, Къуруш хуьруьн юкьван мектебдин директор Эмирагъа Гьажиева ва масабуруни чи халкьдикай марагълу малуматар гузва.

     Лезги чилерин къамат къалурзавай сегьнеяр - чи шегьерринни хуьрерин, чи дагъларинни вацIарин, чи бегьерлу багъларин, яйлахрин акунар вирибур гьейранардайди хьанва. Фильмдин режиссёрар Василий Щербенко ва Николай Макаров, директор Светлана Федина я. Фильм чIугваз лезги халкьдин кьегьал хва Имам Яралиева ва СтIал Сулейманан райондин кьил Нариман Абдул­муталлибова мукьувай куьмекар ганва.

 

Тамилла БЕКЕРОВА,

Дагъустан Республикадин Дербент шегьер,

муаллим