КцIарин мярекат
Этнография  |  3(297) 2016      
     Алай йисан 11-апрелдиз Азербайжан Республикадин Медениятдин ва Туризмдин Министерстводин «Чкайрай кьилин шегьердиз» проектдик кваз КцIар райондихъ галаз танишардай мярекат кьиле фена. 
    Мярекат КцIар Райондин Крар Кьилиз Акъуддай Идарадин куьмекдалди, Баку Шегьердин Медениятдин ва Туризмдин Кьилин Идарадин ва КцIар Райондин Медениятдин ва Туризмдин Отделенидин тешкилатчивилелди Азербайжандин Гьукуматдин Жегьил Тамашачийрин Театрда тухвана.
     ТIебиатди вичиз гьар жуьредин  няметар бахшнавай, зегь­метдал рикI алай, гьахъ ва дуствал гьамиша вине кьазвай лезгийрин дамах тир КцIар къе вириниз сейли я. Аслу тушир Азербайжан кIвачел акьалдар хъувур машгьур сиясатчи Гьейдар Алиева лагьанай: «Чпихъ Шагь дагъ хьтин такабурлу дагъ, иер тамар, вацIар, булахар авай кцIарвияр гьар са куьнилай вилик кьегьал инсанар я.»
     КцIарай XII-XX виш йисара 120-дав агакьна зарияр, эхиримжи 50 йисан къене 150-далай гзаф илимрин докторар, 500-дав агакьна илимрин кандидатар, шумудни са академикар акъатнава. Генерал Магьмуд Абилов, Советрин Союздин Игит Мирзе Велиев, Болгариядин игит Салагь Салагьов, «Эллиндин къагьриман» хьиз Грециядиз сейли хьайи Мидгьед Ширинбегов хьтин къагьриманрин ватан я КцIар.
     Гьа ихьтин сейли райондин тарихдинни медениятдин ирс, адетар, тIвар-ван авай инсанар, халкьдин устIарвал, харусенятдин чешнеяр, цIун кIвал, экономикадинни туризмдин рекьяй мумкинвилер, хуьруьн майишат къалурзавай выставкади театрдин фойеда вирибур гьейранарна.
     Мярекатдал рахай медениятдин ва туризмдин министр Эбуьлфес Къараева лагьайвал, КцIар райондихъ галаз танишарун «Чкайрай кьилин шегьердиз» проектдик кваз тухвай 12 лагьай мярекат я. Алай йис чи уьлкведа «Мультикультурализмдин йис» хьиз малумарнавайди рикIел хкай министрди КцIар районда мультикультурализмдин гьалар авайди кьилди къейд авуна.КцIар район гьакIни Медениятдин ва Туризмдин Министерстводин «Халкьдин яратмишунрин меркезар» программадив кьадайвал, 2016-йисан «Азербайжандин фольклордин меркез» тирди малумарна.
     КцIар Райондин Крар Кьилиз Акъуддай Идарадин кьил Шаир Алхасова къейд авурвал, «Чкайрай кьилин шегьердиз» проектди КцIариз ва кцIарвийриз чпин меденият, фольклор, туризмдин вири такьатар къалурдай мумкинвал гузва. Чкайрал инфраструктурадин проектар кьилиз акъудзава. КцIара медениятдин гуьмбетар гуьнгуьна хтунин, медениятдин объектрин база мягькемарунин рекьяй гзаф крар кьиле тухванва.
     Туризмдин мумкинвилерикай рахадайла Ш.Алхасова КцIар вичихъ лугьуз тежедай кьван иер тIебиат авай, жуьреба-жуьре туризмдин къуллугъар къалурзавай район тирди малумарна.
     Мярекатдал райондин яшайиш ва майишат вилик финикай, алай девирда адан агалкьунрикай, туризмдин мумкинвилерикай, девлетлу медениятдикай ихтилатзавай видеочарх къалурна.
     Эхирдай КцIар райондин манийрин ва куьлерин коллективри концерт гана.
 
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
КцIар шегьер ЧIалаз икрам ийин Кьве хтул Сейлибурун кьилив За ви сурал цуьквер гъида…
Статьи из этой рубрики
Яран сувар - жуван сувар Халкьдин манийрин фестиваль Яран мелер Яран манияр Чан дидедин
ЦIИЙИ ТИЛИТ
№: 9(314)
октябрь, 2017

Скачать PDF

РУБРИКИ

ПОЛЕЗНОЕ