Чешне къалурзава
Дагъустан  |  4(298) 2016      
     СтIал Сулейманан район Дагъустан Респуб­ликадин виридалайни чIехи районрикай сад я. Археологиядин материалрай ва къадим чешмейрай малум жезвайвал, адан са бязи хуьрерихъ 3-5 агъзур йисарин тарихар ава. Райондин чилерал Алупан гьукуматдин девирриз талукь археологиядин амукьаяр гьелени дуьшуьш жезва. 
      Дагъустан Россиядихъ гилигайдалай кьулухъ гилан райондин чилер Куьре ханлухдик, гуьгъуьнлай Куьре округдик акатна. Совет гьукуматдин вахтунда, 1929-йисан 3-июлдиз Касумхуьруьн район арадал гъана. А чIавуз гилан Мегьарамдхуьруьн райондин вири чилер, гьакIни Кьурагь, Хив ва Табасаран районрин са кьадар чилер и райондик акатзавай. 
     1969-йисуз лезги халкьдин чIехи арифдар, XX виш йисан Гьомер СтIал Сулейманан 100 йисан юбилейдихъ галаз алакъалу яз райондиз адан тIвар гана. Алай вахтунда вичихъ 40-дав агакьна хуьрер авай СтIал Сулейманан районда 60 агъзурдалай гзаф агьалияр яшамиш жезва.
     СтIал Сулейманан район чешнелу ийизвай кьилин лишанрикай сад инаг зурба шаиррин ва алимрин ватан хьунухь я. И чили Куьре Мелик, Рухун Али, Алкьвадар Гьасан, Етим Эмин, СтIал Сулейман, СтIал Саяд, Алибег Фетягьов, Ибрагьим Гьуьсейнов, Абдуселим Исмаилов, Фейзуддин Нагъиев, Майрудин Бабаханов, Абдул Фетягь, Сажидин, Пакизат Фатуллаева хьтин шаирралди, Зияуддин Эфендиев, Абдулбари Магьмудов хьтин кхьирагралди, Унейзат Мейланова, Абдусалам Гьуьсейнов, Амри Шихсаидов, Гьамидуллагь Мегьамедов, Абуталиб Абилов, Маил Аминов, Камалудин Гьажиев, Мавлуд Ярагьмедов, Эйзудин Нагъиев, Нариман Абдулмуталибов хьтин алимралди дамахзава.
      И район машгьур конструктор, контр-адмирал Гьенрих (Исмаил) Гьасанован, Дагъустандин пешекар музыкадин буба Готфрид (Жабраил) Гьасанован, сейли композитор Сейфуллагь Керимован, машгьур генералар Мегьамедгьанифа ва Гьажикъурбан Шейдаеврин, Тагьир Эминован ватан я. Санлай къачурла СтIал Сулейманан райондай 400-далай гзаф алимар, 20-дав агакьна академикар, 1 адмирал, 10 генерал, 90-дав агакьна полковникар акъатнава. 
Алай вахтунда районди багъманчивал ва уьзуьмчивал вилик тухунин, хуьрер авадан авунин, халкьдин къадим адетар, меденият, хайи чIал хуьнин рекьяй вири лезги районриз хъсан чешне къалурзава. 
      Вичихъ хъсан гьава, мублагъ чилер, цIуд­ралди минерал ятарин булахар, къалин тамар, бегьерлу багъларни уьзуьмлухар авай СтIал Сулейманан район йис-сандивай вилик физва. Адаз сагъвал хуьдай тIебии санатория лугьуз­ва. Виридалайни гзаф рикI шадардай кар ам я хьи, ина лугьуз тежедай кьван къени, умун, зегьметдал рикI алай, ватанперес инсанар яшамиш жезва.
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я! Дагъустандин йикъар Жуван халкьдиз вафалу жен Гурлудиз кьиле фена “Сувар” ансамблдин 20 йис хьана
Статьи из этой рубрики
Дагъустандин йикъар Кпул ятар Дагестан распахнул объятия Гурлудиз кьиле фена «Къарагъ, эллер, чIал хуьз экъечI!»
ЦIИЙИ ТИЛИТ
№: 9(314)
октябрь, 2017

Скачать PDF

РУБРИКИ

ПОЛЕЗНОЕ