"Самур" - 20  |  3(250) 2012      

Алатай асирдин 90-йисара - кака-хьай, четин девирда, чIехи дегишвилерин макъамда арадал атай “Самур” газетдин 20 йис тамам хьана. 20 йис - им чIехи девир туш, жегьилвилин жанлу къуват-такьат, гележегдихъ умудар аваз вилик камар къачузвай лап хъсан бере я.
Четинвилеризни дарвилериз килиг тавуна ара датIана акъатай “Самур” газетди лезги халкьдин тарихда гел туна. Чи халкь четинвилер алудунал, демократиядихъ ялзавай цIийи жемият туькIуьрунал желбна, адаз вилик фидай рекьер къалурна. Куьруь вахтунда “Самур” халкьдин трибунадиз элкъвена, адакай милли кьетIенвилер, чи руьгьдин чешмеяр хуьдай, лезгияр хъсан крарихъ ялдай газет, камаллувилин хазина, литературный лезги чIал вилик финин чешме хьана.
ЦIийи йис алукьай йикъалай инихъ 400-дав агакьна кIелзавайбуру, алимри, шаирри, кхьирагри, журналистри, жавабдар къуллугърал акъвазнавай ксари, газетринни журналрин редакторри ва маса инсанри “Самур” газетдин редакциядин кIвалахдарриз 20 йисан юбилей мубаракна. Къецепатан 24 уьлкведин лезгийри чун тебрикна. Им рикI шадардай, чак руьгь кутазвай кар я. Чна редакциядин патай квез разивал къалурзава играми кIелзавайбур!