Чи тавдин кIвал  |  3(250) 2012      

- Лезги чIалахъ ялзавай, Ватан-дивай яргъара адан таъсиб чIугвазвай, интернетдин лезги сайтара кардик кутунвай форумра вич чешнелу жезвай Заур КцIарви вуж я?
- Зун 1981-йисуз Свердловск ше-гьердин патав гвай са хуьре, военный частуна къуллугъзавай са лезги прапорщикдин хизанда дидедиз хьана. Пуд лагьай синифдалди ина мектебдиз фейи зун хъсан кIелзавай аялрикай сад тир. Ктаб кIелунал зи иллаки рикI алай, исятдани гьакI я. Ингье а чIавуз за акI фикирдай хьи, гуя вири аялар гъвечIи чIавуз Володя Ульяноваз, чIехи хьайила Юрий Гагариназ ухшар хьана кIанзвайди я.  Бубади кIвалахдин икьрар кьилиз акъудайла, чи хизан ватандиз, КцIар райондин Вурварин хуьруьз куьч хьана. КIелун хуьруьн мектебда давамарна за.
Алай вахтунда зун жуван хизанни галаз Краснодар шегьерда яшамиш жезва, карчи я. Кьве хва ава захъ.
 - ГьикI хьана интернетдив  агатна вун?
- Кьуд йис инлай вилик «Одноклассники» сайтиник экечIай зун са шумуд лезги группадив агатна. А группайрин форумра кьиле физвай дискуссияр акурла, зазни ана мукьувай иштиракиз кIан хьана. Гьарада вичин фикирар ла-гьана, веревирдер ийидай са ким туькIуьриз кIан хьана заз. Дуьньяда социальный сайтар къвердавай генани сейли жез акурла за и форумра веревирдер авун важиблу яз гьисабна. Гила ина агъзурралди лезгияр кIватI хьанва: яшлубурни, жаванарни, дуьньядин чара-чара пIипIера яшамиш жезвай инсанарни. Проблемайрикай санал веревирдер ийидай, сад садал меслят гъидай мумкинвал ганва чаз интернетдин сайтари.
Са береда и кар гьич акьулдизни къведачир. Зун квай группайрикай сад «Лезгияр» тир. Заз а группадин темайрикай, альбомрикай, форум туькIуьрнавай жуьредикай гзаф хуш атана. Адан администратор, интернетдин милли форумра гзаф зегьмет чIугвазвай Анар Уьнуьгъви я. Адан алакьунар акурла заз Анараз куьмек гуз, гьакIни жуван рикI алай са кар кьиле тухуз кIан хьана.
- Алай вахтунда лезги жегьилрин интернетда авсият гьи жуьреда кьиле физва?
- Са форумда са йисалай гзаф вахтунда «ацукьай» форумчидиз форум сегьне хьиз аквада. Форумдив цIийиз агатайбуру лагьайтIа, иниз чпин фикирар гъиз-ва, суалар гузва, жавабар къачузва. Чна сифте жегьилрин суалрихъ хъсандиз яб акалзава, ахпа суалриз жавабар къведай темаяр ачухарзава. Группадин форумдив духтурар, алимар, юкьван мектебрин муаллимар, шаирар, диндин рекьяй чирвилер авай инсанар ва маса савадлу инсанар гзаф агатнава. Форумда чирвилер авай инсанрихъ галаз дискуссийрикай жегьилри менфят къачузва. Чи халкьдин вилик-кьилик квай ксарин кьадар и форумда гьикьван пара хьайит1а, гьакьван хъсан я, абурун гафар, меслятар чаз виридаз герек я.
- Краснодардин лезгийрикай чаз куь куьмекдалди къведай тилитра гегьенш малумат гуз кIандай.
- Зун Краснодарда яшамиш жез муьжуьд йис я. Авайвал лагьайтIа, заз Краснодарда икьван гзаф лезгияр авайди чизвачир. Фад-фад раст къведа жуванбур, гьич фикирдиз къведачир чкайрал «салам-алейк» лагьана ви вилик акъатда. Заз куьмек гузвайбурни, за  куьмек гузвайбурни гьалтзава. Краснодар вилаятдихъ лезги жемиятни ава. Ам арадиз гъайиди Мирзебала Абдул-лаев я. Исятда жемиятдин кьил Ярагьмед Ярагьмедов я. Нажмудин Муртузов седридин заместительни я, «Дагестанские канатоходцы» тIвар ганвай группадин регьберни. Абур лезги халкь патал гзаф зегьмет чIугвазвай инсанар я.
- "Самур" газетдикай куь фикирар чириз кIандай.
- «Самур», са шакни авачиз, лезги халкьдин дамах, алай девирда халкьдин медениятдихъ гелкъвез-вай зурба газет я. Лезгийрик дамах кутазвай, чи халкьдин кьегьал инсанар чаз чирзавай газет я.
Адан чинриз акъатзавай лезги чIалаз, тарихдиз, халкьдин адетриз, фольклордиз, медениятдиз, дуьнья-дин чара-чара чкайра уьмуьр гьалзавай чи ватанэгьлийриз талукь рубрикаяр гзаф бегелмиш я чаз. Са гафуналди, «Самур» газетди чи рикIера лезгивилин экв куькIуьр-зава. «Самур» газетдин редакциядин коллективдиз мадни чIехи агалкьунар тIалабзава чна. Куьне чIугвазвай зегьметар садрани квахь тавурай.

“САМУР”