Кьегьалар рекьидач!
Редактордин гаф  |  2(307) 2017      
     Чингиз Къурбанов. Къенин юкъуз Азербайжанда и кьегьал лезгидин къагьриманвилер ван тахьай кас бажагьат жеди. Адан хъвер авай чин, дуьньядихъ къаних вилер рикIелай алатдач. И жегьилдихъ 39 юкъуз шехьна Азербайжан.
     2016-йисан 29-декабрдиз эрменийрин нубатдин ягьсузвилин вилик пад кьадай чIавуз Чингиз Къурбанова кьегьалвилелди женг чIугуна душмандин 3 аскер кьена, вични гьелек хьана. 39 юкъуз адан мейит душмандин пата есирда амукьна. Дуьньядин шумудни са тешкилатрин тIалабунар кваз такьаз, адан мейит вахкун тийиз, шегьиддин хайибур, мукьва-кьилияр къарсурна, абурув эхиз тежер дерт чIугваз туна душманди. 39 юкъуз Чингизан бубадихъни дидедихъ галаз санал шехьна инсанар. Чингиз вири Азербайжандин веледдиз элкъвена.
     1994-йисуз КцIар райондин Яргун хуьре дидедиз хьайи Чингиз Салманан хва Къурбанов адетдин жегьилрикай тушир. Диде-бубадал, стхадал, мукьва-кьилийрал, хуьруьнбурал гзаф рикI алай адан. Вирибурув рикIивай агатдай, вичелай алакьдай куьмек гуз алахъдай. Буба Салманани диде Наиледи чIугвазвай зегьметдин эвез гьикI вахкуда лугьуз фагьумдай ада. Ам Азербайжандин Техникадин Университетдик экечIайла абурун хизанди Бакудиз куьч хьана кирида кIвал кьунай. Гъуьлуьни папа «Метак» компанида кIва­лахиз чпин кьве хцив кIелиз тазвай. Чингизан гуьгъуьналлаз адан гъвечIи стхани институтдик экечI­навай.
Алатай га­туз институт акьалтIарай Чингиз ха­йи­­буру ас­кер­ви­лиз рекье ту­­най. Алай йи­сан июлдиз ам кIвализ хтана кIанзавай. 22 йиса авай и кьакьан буйдин, къени къилихрин, кесибвиле чIехи хьанвай жегьилдин рикIе мурадри цIирзавай. «За куьне чIугур кьван зегьметрин эвез вахкуда. Аскервал кьилиз акъудна зун хквен, кIвалахал акъвазин, аку за квев гьикI ял ягъиз тадатIа», - лугьуз дидедизни бубадиз чан-рикIдай ада.
     Умун къилихрин же­гьил хайи хуьрени, вичи кIелзавай институтдани ви­рибуруз пара кIандай. Кьегьал кIвале хада, женгина рекьида, - лугьуда бубайри. КьатI хьана кьегьалдин уьмуьр. Ингье им са маса жуьредин кьиникь хьана. Чан аламаз Чингиза вичи, гьелек хьайидалай кьулухъ адан мейитди женг чIугуна. Эхирни Одиссей хьиз ватандиз хтана. Адан кIвачел вири Азербайжан къарагъна. 
5-февралдиз Бакудин военный гимназияда гьу­куматди Чингизан тазият кьиле тухвана. Ахпа мя­рекат шегьиддин хайи ватан тир КцIар районда давам хъхьана.      Военный кортежди рекье твазвай шегьиддин мафедин вилик инсанрин сел экъечIнавай. Шегьердин Шегьидрин хиябанда кьиле фейи тазиятда военнийри, Милли Межлисдин депутатри, райондин регьберри ва масабуру иш­ти­ракзавай. Ина вилерай накъвар кIва­хьзавачир касни авачир. Завайни жуван гъам ацIанвай гьиссер хуьз жезвачир. Абур элегиядиз элкъвезвай.
 
Хайи чил, вав аламат гва,
Ватан лугьуз ви кьегьал хва,
Хтанва къе ви накьвадал,
Эхъуьра ам на накъвада.
 
Ахъая на чими къужах,
Яхъ баладин къайи къундах.
ЯхцIур юкъуз тIал чIугур тан,
Агуд жував лагьана чан.
 
Агь, яцIарай акъатнавай,
А юргъун руьгь – галатнавай,
ЯхцIур юкъуз жагъурайд гьахъ,
Чан-рикI ийиз на хурал яхъ.
 
Шехьа диде, эха буба,
Тазиятдиз ша эл-уба.
Тахтунавай чам рекье тур,
Эхиз тежер гъам рекье тур.
 
Кьегьал хва тир пурар акур,
Гарар акур, харар акур.
Мад такурай чаз ихьтин дерт,
ИкI тефирай рухваяр мерд.
 
     Гьа юкъуз Азербайжан Республикадин Президент Илгьам Алиева Чингиз Сал­манан хва Къурбановаз «Азербайжандин Милли Къагьриман» тIвар гун патал серенжем кьабулайла инсанрин рикIериз регьят хьана. И хабар ван хьайи вирибуру сад хьиз лагьана: «Дидедин нек хьиз гьалал я и тIвар Чингизаз!» Инсанрин шелни хъвер сад-садахъ какахьна.
     Муькуь юкъуз Къурбановрин хи­зан – Чингизан буба, диде ва стха Азер­байжандин Президент Илгьам Алиева кьабулна. Ада 10 касдихъ галаз къуватар сад хьтинбур тушир женгиник кьил ку­тур, кьегьалвилелди гьелек хьайи и же­гьил хвена тербия авур диде-бубадиз, гьакIни вири КцIар райондин агьалийриз разивал къалурна, Азербайжандин Милли Къагьримандин тIвар тестикьарзавай документар абурув вугана.
     Кьве югъ алатайла президентдин тапшуругъдалди шегьиддин хизандиз Бакуда 3 утагъдин кIвал, КцIар районда кIвал эцигун патал чил чара авуна, шегьердин куьчейрикай садаз адан тIвар гана. Уьлкведин чIехидан и къайгъударвал виридан рикIяй хьана.
     Кьегьал кьейилани кьегьал я лугьуда чи бубайри. Чингиза вичин гьунардалди тек са хайи хизандик, хайи хуьруьк, райондик ваъ, гьакI вири лезгийрик дамах кутуна. Ада ватандиз, хайи чилиз вичин вафалувал субутна.
     Аллагьди рагьмет авурай! Кьегьал хцин экуь къамат чи рикIера гьамишалух яз амукьда.
Седакъет КЕРИМОВА
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Азизан Алем ЧIал хуьнин мураддалди Лезги чIалан тарсар Агалкьунар тIалабзава
Статьи из этой рубрики
Пара жезва ЧIехи хьанва Кьве гъвечlи аял Жегьилрин меркез Чешне яз къалурна
ЦIИЙИ ТИЛИТ
№: 7(312)
август, 2017

Скачать PDF

РУБРИКИ

ПОЛЕЗНОЕ