"Самур" - 20  |  9(244) 2011      

Играми кIелзавайбур! Зун фадлай «Самурдин» теблигъатчи я. Са шумуд йис инлай вилик газетдик къуьн кутада лагьана кардив эгечIнай зун. КIвенкIве 20, ахпа 30, гуьгъунлай 50 касдив газет кхьиз туна за. Алай вахтунда зи патай 56 касди «Самур» кхьенва. Гележегда, яни юбилейдалди захъ и рекъем 80-дав агакьардай ният ава. За гьакIни газет Къуба райондин Хъимил ва Хъимил Къазма, Хачмаз райондин Хъимил хъишлах хуьрерин агьалийрал агакьарзава.
За газетдин таъсиб чIугун дуьшуьшдин кар туш. «Самурдин» коллективдин зегьметчивили гьейранарзава зун. Чи тIвар-ван авай журналистарни  шаирар тир Седакъет Керимовади ва Муьзеф-фер Меликмамедова халкь патал гьакъисагъвилелди чIугвазвай зегьметар квахьдайбур туш. Абуру чаз чи чIал, меденият, тарих, эдебият, адетар гьикьван кIанарзава.
Заз чиз, алай вахтунда «Самур» лезги газетринни журналрин арада виридалайни хъсан чIалан женгчи я. Ада чаз чи тарихар, ацукьун-къарагъун чирзава. Газет чун патал тербиячини я, муаллимни. Ингье ам кIевера ава. Чна лагьайтIа, «Самурдиз» герек тирвал куьмек гузвач. Заз шумудни са агьваллу лезги чида. Абурукай са шумудаз за лугьунни авуна: «Я стхаяр, куьн лезгияр тушни? Лезгияр ятIа бес вучиз газетдиз куьмекдин гъил яргъи ийиз-вач? Куьн гьарад са хуьряй я. Жечни куьне гьарада вацра 20-30 газет къачуна жуван хуьруьнбурал рахкъурайтIа? «Самурдал» рикI алай, амма къачуз тежезвайбуруни квез алхишдайвал».
Играми газет кIелзавайбур, адан таъсиб чIугвазвайбур, ша, чна «Самур» гьар хизандиз!» эверун кьилиз акъудин. ИкI хьайитIа, чавай виш агъзурралди лезгияр яшамиш жезвай чи республикада газетдин тираж вадра, цIудра артухариз жеда. РикIел хуьх: газетдиз куьмек гуналди куьне лезги халкьдин чIал, тарих, меденият, адетар хуьз куьмек гузва. Ша, чна «Самурдик» халисан лезгийри хьиз къуьн кутан. Яргъалди фий хайи газетдин уьмуьрар. Газетдин 20 йисан юбилейдик чнани чи пай кутан. И мярекатдалди гьич тахьайтIа, мад са агъзур, кьве агъзур касди газет кхьирай. Лезгияр ятIа, чна и метлеб кьилиз акъудна кIан я!
Авайвал лугьун, тек са эверуналди крар туькIуьзвач. Халкьдин багъри газет кхьин патал чи хуьрерин вилик-кьилик квайбуруни, муаллимрини, агъсакъалрини датIана гьарада вичелай алакьдай куьмекар гана кIанзава. Бубайри лагьайвал, жуван вацI жува яцIу авуна кIанзавайди я.