Сувариз элкъвей мярекат
"Самур" - 20  |  4(251) 2012      

Алай йисан 18-мартдиз, Яран сувар алукьиз кьве югъ амаз Бакудин Музыкадин Академиядин чIехи залда «Самур» газетдин 20 йисан юбилейдиз талукьарнавай мярекат кьиле фена. Чина хъвер, гъиле цуьквер авай инсанар - кIелзавайбур, мугьманар рикI алай юбилей къейд ийиз атанвай. Мярекатдиз фикирда кьунвай 300 ваъ, 400-далай виниз инсанар атанвай. Гена мярекат тешкилайбуру залдиз виликамаз алава стулар гъиз турди. Гзафбуру къейд авурвал, им анжах газетдин юбилей ваъ, вири лезги халкьдин сувар тир. Къубадай, КцIарай, Хачмазай, Шабрандай, Огъуздай, Къебеледай, Исмаиллыдай, Закъаталадай, Баку ва Сумгаит шегьеррай, гьакIни Россиядай атанвай мугьманри мярекат гзафни-гзаф гурлу ийизвай.
Лезги манидин авазди залда ацукьнавайбурун гьиссер юзурайла межлис тухузвай кьве жегьилди - Альвия Гьасановади ва Шагьин Залова мярекат ачухарна. Сифте яз «Самур» Лезги Милли Меркездин кьил Шаир Гьасанов рахана. Ада Азербайжанда демократиядин, вири дуьньядиз сейли сиясатчи Гьейдар Алиева кьиле тухвай сиясатдин нетижа яз арадал атай «Самур» халкьдин газетдиз элкъвенвайди кьилди къейд авуна. Пуд чIалал   акъатзавай, лезги, Азербайжан, урус ва маса халкьарин арада дуствилин алакъаяр мягькемаруниз къуллугъзавай «Самур» газет хуьн патал гьар са лезгиди вичелай алакьдай куьмекар гана кIанзавайди лагьана.
Газетдин кьилин редактор Седакъет Керимовади «Самурдин» 20 йисан тарихдикай, адан агалкьунрикай, четинвилерикай ихтилатна. Ада лагьайвал, газет вири халкьди хвена. Халкьдин газет тирвиляй «Самур» девирдин имтигьанрайни лайихлудаказ акъатна. Кьилин редакторди халкьдин патай газетдихъ гьихьтин гьуьрмет аватIа делилралди къалурна: «Самур» Азербайжандин ва Дагъустандин кIелзавайбурулай гъейри 23 къецепатан уьлкведин кIелзавайбуруни къачузва. Азербайжандин ва къецепатан уьлквейрин 87 газетди ва журналди «Самурдикай» макъалаяр чапна. ЦIийи йис алукьай йикъалай инихъ 400-дав агакьна кIелзавайбуру коллективдиз юбилей мубаракна.
С.Керимова гьакIни газетдин даяхрикай, абуру «Самурдиз» гайи куьмекрикай рахана. Редакциядин вилик акъвазнавай везифаяр кьилиз акъудун патал газетдин кIвалахдарри ва кIелзавайбуру санал, къуьн-къуьне туна кIвалахна кIанзавайди къейд авуна. Эхирдай ада мярекат арадал гъиз куьмек гайи «Самур» Лезги Милли Меркездин кьилевайбуруз ва Бакудин Музыкадин Академиядин регьберриз разивал къалурна.
«Самур» газетдин редактордин замес-титель Муьзеффер Меликмамедова халкьдин тарих, чIал, меденият, ацукьун-къарагъун, литература теблигъ авунихъ авсиятда газетди гьихьтин агалкьунар къазан-мишнатIа, икьван гагьди малум тушир гьихьтин тарихар винел акъуднатIа, гьихьтин месэлаяр къара-гъарнатIа де-лилралди къалурна.
  Дагъустандин Азербайжанда авай векилханадин советник Людмила Къазиевади Дагъустандин Гьукуматди журналистикада яргъал йисара чIугур гьа-къисагъ зегьметдай Седакъет Керимовадиз гайи грамота адав агакьарна ва гьукуматдин председателдин тебрик кIелна.
Азербайжанда яшамиш жезвай татаррин «Тугантел» жемиятдин кьил Гуьлжан Мясоутовади вичин рахунра «Самур» газетдиз, адан коллективдин зегьметдиз лайихлу къимет гана ва жемиятдин тебрик кIелна. Ада чи республикадин халкьарин арада дуствал мягькемарзавай «Самурдикай» лагьай гафар мярекатда иштиракзавай азербайжанвийрин, урусрин, татаррин, талышрин, куьрдерин, татрин, цIахуррин, рутулрин, будугърин, хинелугъвийрин, гьапутрин векилрин рикIяйни хьана.
Мярекатдиз и мукьвара Магьачкъа-лада вичин 90 йисан юбилей къейд авур «Лезги газетдин» редакциядин векилни атанвай. Газетдин хсуси мухбир, тIвар-ван авай композитор, Дагъустан Респуб-ликадин искусствойрин лайихлу деятель Къагьриман Ибрагьимова коллективдин тебрик кIелна ва «Самурдин» кIвалах-дарризни кIелзавайбуруз мадни чIехи агалкьунар тIалабна.
Техникадин илимрин доктор, академик Камал Абдуллаеваз вичи авур рахунрай гурлу капар ягъана. Ада лагьана: «Къе халкьдин рикI алай газетдиз элкъвенвай «Самурдин» макъалайрикай за гегьеншдиз менфят къачузва. И газет гъиле кьурла ам битав са институтдин коллективди акъудзавайди хьиз жеда. Ина гзафни-гзаф малуматар авайвиляй, чи чIалакай, тарихдикай, медениятдикай дерин метлебдин макъалаяр чапзавайвиляй. Гьакъикъатда лагьайтIа, газет чи дамах тир кьве машгьур журналистди - Седакъет Керимовади ва Муьзеффер Меликмамедова акъудзава. Ша, чна ихьтин марагълу газетдиз мукьуфдалди куьмек гун, ам хуьн, гележег несилри адан 50 йисан, 100 йисан юбилеяр къейд ийидайвал».
Газетдиз гьа ихьтин яргъи уьмуьрар ва агалкьунар тIалабайбур мадни хьана. «Самурдин» сад лагьай редактор Фейруз Беделован, Нобел информациядин меркездин Къафкъаздин ва Юкьван Азиядин уьлквейрин векил Бейбала Алескерован, газетдин даяхрикай тир Марьям Алибеговадин, КцIар райондин Яргун хуьруьн юкьван мектебдин муаллим Маил Бабаханован, Ширвановка хуьруьн     юкьван мектебдин муаллим Наталья Алибеговадин, «Самурдин» Худат ше-гьердин корпунктдин кьил Бегьрам Залован, Къебеле райондин тIвар-ван авай духтур Шагьисмаил Исмаилован, политикадин илимрай философиядин доктор Мамедагъа Сардарован ва масабурун рахунар вирида гурлу капар ягъуналди кьабулна.
Мярекатдин рикIел аламукьдай легьзейрикай садни жегьилрин куьмекдалди «Самур» газетдин сайт экрандай къалурун хьана. Сайт девирдив кьадайди, регьятдиз менфят къачуз жедайди я. ТIвар-ван авай жегьил журналист, «Известия» газетдин завотдел Лейла Амировади интернетдин куьмекдалди къецепатан лезгийринни залда ацукьнавайбурун арада муьгъ туькIуьрна. Сегьнеда туькIуьрнавай чIехи экрандай Америкада, Германияда, Англияда, Францияда, Россияда, Туьркияда ва маса уьлквейра яшамиш жезвай лезгийри «Самурдин» коллектив ва вири кIелзавайбур тебрикна.
Искусстводин илимрин доктор, Бакудин Музыкадин Академиядин профессор Тариэль Мамедова Академиядин коллективдин патай газетдин кIвалах-дарар ва кIелзавайбур тебрикна. Ахпа ада цIийиз чапдай акъудай «Азербайжандин халкьарин 50 мани» тIвар алай ктабдикай ва ана гьатнавай республикадин халкьа-рин, гьакIни лезгийрин манийрин караокедикай ихтилатна. Ада гьакIни и карда вичиз куьмек гайи «Самур» газетдин редактордиз разивал къалурна. Ахпа вири залди Тариэль муаллимдин регьбервилик кваз лезги манийрин караокедин сифте чубарук тир «Лезгинкадал илига» мани лагьана.
Мярекатдин виридалайни марагълу легьзейрикай сад «Самур» газетдин кIвалахдарар - Муьзеффер Меликмамедов, Къошкъар Алиев, Азизрин Севда, Роза Гьажимурадова, Гьадиса Пирметова ва Сабина Мамедова сегьнедиз экъечIун хьана. Газетдин директор, адан техникадин месэлайриз жавабдар тир Мубариз Азизов лагьайтIа, и гъилдани кадрдин кьулухъ амукьна. С.Керимовади вичин рикI алай коллективдиз разивал къалурайдалай кьулухъ газетдин даяхар виридаз танишарна. КцIарай атай Натикь Алиев, Нариман Османов, Надиршагь Ширинов, Шагьаб Салманов, Маил Бабаханов, Наталья Алибегова, Хачмазай атай Бегьрам Залов, Камран Къурбаналиев, Незакет Керимова, Рауф Няметов, Айдын Корогълуев, Бакудай тир Афер Алифов, Абир Тагьиров, Илгьам Ферма-нов ва масабур сегьнедиз экъечIайла абуруз залди яргъалди гурлу капар яна. С.Керимовади газетдин кIвалахдарризни даяхриз редакциядин патай савкьватар гана.
Мярекатдин кьвед лагьай пай машгьур «Сувар» ансамблдин концертдалди рикIел аламукьна. Ансамблдин солистрикай Жавагьир Абдуловади, Эльвина Гьейдаровади, Роза Гьажимурадовади, Жемиля Заловади лагьай манийри, рушарини гадайри кьилиз акъудай кьуьлери мярекатдин иштиракчияр гьейранарна. Ахпа лезги таватри «Перизадаяр» лугьуз-лугьуз залдавайбуруз суварин хунчайрай Яран ширинлухар  пайна. Чпин разивал къалурзавай инсанри сегьне цуькверин гьуьлуьз элкъуьрнавай...

Муьзеффер МЕЛИКМАМЕДОВ

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
Дуьньядиз сейли хьиливияр Avar şairi ilə görüş “Сувар” приглашает Коллективу редакции «Самур» Лезги зарийрин юбилеяр ( 2012 - йис )
Статьи из этой рубрики
«Самур» чи ивидин дамар я Агалкьунрин 20 йис «Самур» гьар хизандиз! “Самур” газетдин 20 йис тамам хьана! Коллективу редакции «Самур»
ЦIИЙИ ТИЛИТ
№: 8(353)
декабрь, 2021

Скачать PDF

РУБРИКИ
Tarixin izi ilə
Gəncliyimiz – qürurumuz
Чи къагьриманар
Yubiley
Люди и судьбы
Шаирар
"Самур" - 30
Редакциядин дустар
Яран сувар
Qarabağ müharibəsi
Diqqət: İnsan taleyi!
İnam və iman
"Soyuq günəş"
ЦIийи фильм
Dünya xalqları
Чи тарих
Тарих авайвал
Müsahibə
Спасём планету
Dünya ləzgiləri
Дагъустан
Диктант
Чи кьегьалар
Редактордин гаф
Чи классикар
"Самур" - 20
Мах
ЦIийи ктабар
Жеч гьа!..
Dağıstan xalqları
И чил хайи диге я
Добрые вести
Milli Məclisə məktub
Новости Россотрудничества
Известные лезгины
Марагълу инсанар
Redaksiyaya məktub
Языки мира
Лезги чIалан месэлаяр
Квез чидани?
Известные лезгиноведы
Лезгияр вирина
Юбилей
SOS!!!
С верой в душе
"Самурдин мектеб"
Мораль
Чи адетар
Məşhur ləzgilər
Новости на все голоса
Чи хуьрер
Хъсан хабарар
Известные кавказоведы
Чи адетар
Yeniliklər
Чешне къачу!
Чакай кхьенай ...
Алимрин веревирдер
Çıxışlarımızın əks-sədası
Барка
Эпитафия
Ша, лезги чIалал рахан!
Хабарар
Тарихдин геле аваз
Поэзия
Харусенят
Этнография
Дагестан
Народы мира
Спорт
Инсанар, кьисметар
Редакциядиз чар
Чир-течир
Yeni kitablar
Фольклор
Чи сейлибур
Дайджест
Чи тавдин кIвал

ПОЛЕЗНОЕ