Гьар са муаллимдин  кьилин винизвал ада тарс гайи же­гьил­ри чпин уьмуьрда къазанмишай агалкьунар я. Абур хуьруьз, ра­­йондиз, республикадиз лайихлу ин­са­нар, хъсан пешекарар хьиз  сейли хьуни дамах кутада муаллимрихъ. Вичи кутур багъдин бегьерди багъманчидиз хвеши ийидай саягъда муаллимдин рикIни шадвилин гьиссерив ацIурда абуру.

     Ихьтин са жегьилдикай я зи их­тилат. Самира Мегьамедрагьиман руш Рус­та­мовадикай. И йикъара адаз до­центвилин илимдин тIвар ганва ла­гьай шад хабар чал агакьайла адаз тарс гайи муаллимрик виридак лувар акатна. Эхь, шумудни са йисар я и руша вичин алакьунралди, савадлувилелди, викIегьвилелди, гьакIни къени къи­лихралди виридаз шад гьиссер бахш ийиз.

     Яргун хуьруьн юкьван мектеб та­фаватлувилелди акьалтIарай ам Баку­дин Гьукуматдин Университетдин би­о­­логиядин факультетдик экечI­най ва анаг яру дипломдалди куь­т­ягь­най. Инин магистратурани тафа­ватлувилелди акьалтIарай Самира Азер­байжандин Милли Илимрин Ака­демиядин Ботаникадин Институтда илим­дин къуллугъчивиле кьабулнай. 2013-йисуз ада гьазурай илимдин проектди Азербайжан Республикадин Пре­зидентдин Илим Вилик Тухунин Фондуни кьиле тухвай конкурсда сад лагьай чка кьунай. Университетда му­ал­лимвал ийиз, илимдин рехъни кьур Самиради 2011-йисуз кандидатвилин диссертация хвена.

     Алай вахтунда Ботаникадин Инс­ти­тутда отделдиз регьбервал гузвай руша АМИА-дин магистратурада мо­ле­куляр биологиядин курсунай тарс гузва. Илимдин четин гураррай са кIар-са кIар виниз хкаж жезвай и руш гила инин кьилин пешекар я.

     2015-йисалай докторвилин дис­сертациядин винел кIвалахзавай жегьил алимдиз виликай къвезмай йисуз вичин ахтармишунар тамамардай ният ава. Гьавиляй датIана зегьмет чIугвазва ада. 

     Икьван гагьди чап хьанвай 70-дав агакьна илимдин кIвалахрин автор тир Самира Рустамовадин эсерар дуьнь­ядин цIудралди уьлквейрин илимрин журналра чап хьанва. Америкадин Сад­хьанвай Штатар, Германия, Авст­ра­лия, Россия, Туьркия, Гьидистан ва маса уьлквейра кьиле фейи илимдин кон­ференцийра авур докладралди пе­шекаррин фикир вичел желб авур лезги рушакай ам чидайбур рикI алаз рахазва. 

     Чна Самира рикIяй тебрикзава, адаз илимдин рекье мадни чIехи агалкьунар тIалабзава.

 

Маил БАБАХАНОВ,

КцIар райондин Яргун хуьруьн  юкьван мектебдин муаллим