Газета Самур

Лезги чIалан мярекат
Лезги чIалан месэлаяр | 3(319) 2018

Алай йисан Лезги чIалан юкъуз – 20-мартдиз Магьачкъалада Дагъустандин Гьукуматдин Педагогикадин Университетдин дараматда «Лезги чIал хуьн ва вилик тухун» тIвар ганвай форум кьиле фена. И чIалан мярекатда муаллимри, чIалан пешекарри, кхьирагри, шаирри, журналистри , илимдинни жегьилрин тешкилатрин векилри иштиракна.

Мярекатдал лагьайвал, алай вахтунда чи машгьур алимрикай Фейзудин Нагъиева, Руслан Къадимова, Шайдабег Мирзоева, Мариф Къадимова, Мегьамед Ибрагьимова, Альбина Крымовади, Султанат Аливердиевади ва масабуру хайи чIал хуьн ва вилик тухун патал гьакъисагъвилелди зегьмет чIугвазва.

Мярекатдал Фейзудин Нагъиева къейд авурвал, алай вахтунда са бязи къелемэгьлийри чпин кхьинра литературный лезги чIалан къайдайриз амал ийизвач. И кардиз рехъ гана кIанзавач. Чавай гьар садавай жуван нугъатдал рахаз жеда. Ингье кхьидайла литературадин чIалал кхьена кIанзава.

Мярекатдал «Интех-Софт» компанийрин группадин кьилин директор, физикадинни математикадин илимрин кандидат Мариф Къадимован рахунар ва ада теклиф авур «Халисан инсан хьухь!» проект разивилелди кьабулна.

ЦIийи проектди форумда иштиракзавай мектебдин директорар ва лезги чIалан муаллимар чпихъ ялна. Абуру къейд авурвал, Мариф Къадимова теклифзавай материалрикай хайи чIалан тарсара гегьеншдиз менфят къачуз жеда.

Мярекатдал рахай филологиядин факультетдин декан Руслан Къадимова ва университетдин илимдин секретарь Шайдабег Мирзоевани хайи чIал хуьн ва вилик тухун патал хъсан теклифар гана. Иштиракчийри лагьайвал, форумди гьам чIалан чара-чара месэлайрикай веревирдер ийидай, гьамни кIвенкIвечи тежрибадикай менфят къачудай мумкинвал гана.

“САМУР”