Дагъустандин лезги районрин муаллимриз, иллаки дидед чIалан пешекарриз Гуьзел Межидова хъсандиз чида. Ада хайи чIал кIанарун патал вичи кIвалахзавай мектебда кьиле тухузвай мярекатар виридак руьгь кутадайбур я. Авайвал лагьайтIа, чал икьван гагьди лезги чIалал икьван кьару, ам жегьил несилдиз икьван дериндиз, рикI алаз чирзавай, датIана дидед чIалан таъсиб чIугвазвай маса муаллим гьалтнач. Гуьзел кьиляй-кьилди дидед чIалан суьгьуьрда авай, йифди-югъ­ди адакай фикирзавай, ам шегьредиз акъудунихъ вичин пай кутазвай инсан я. Лезги эдебият хъсандиз чизвай и дишегь­лидин хайи чIалал фасагьатдиз рахуни иллаки шадарда вун.

     Гуьзел Межидова 1955-йисуз СтIал Сулейманан (виликан Кьасумхьур) ра­­йондин Курхуьре дидедиз хьана. 1982-йисуз Дагъустандин Гьукуматдин Уни­верситет акьалтIарайдалай кьулухъ 42 йис я ада муаллимвиле кIвалахиз. 2005-йисуз ам «Дагъустандин лайихлу муаллим» гьуьрметдин тIварцIиз лайихлу хьана. И тIвар адаз дуьшуьшдай ганач. И савадлу, датIана вичин чирвилер артухарзавай муаллимдин алахъунар халисан тежрибадин мектеб я. 2008-йисуз «РФ-дин виридалайни хъсан муаллим» тIвар патал кьиле фейи конкурсдин  гъалиб хьайи 

     Г.Межидовади 2010-йисуз райондин «Йисан виридалайни хъсан чIалан муаллим» конкурсда сад лагьай чка кьуна. 

     Вичин пешедал рикI алай, датIана цIийивилерихъ ялзавай и муаллимдин регьбервилик кваз аялри дидед чIалаз талукьарнавай мярекатрик мукьвал-мукьвал рябет кутазва. 

     Г.Межидовадин кхьинрални рикI ала. КIвенкIвечи муаллимдин макъалаяр райондин ва республикадин газетрин чинриз акъатзава. Чи тIалабуналди ада «Самурдизни» макъала ракъурнава. Агъадихъ чна ам чапзава.

 

“САМУР”