Поэзия | 3(319) 2018
Лезги манидални шииратдал рик1 алайбуруз Гъулангерек Ибрагьимова хъсандиз чида. Ам муаллимни я, шаирни. Дагъустан Республикадин Мегьарамдхуьруьн райондин Билбилхуьре дидедиз хьайи ада Дербентдин педучилищеда ва Дагъустандин Педагогикадин Университетда к1елна.
Кьисметди Белиждин поселокдиз акъудай Гъулангерека инин гимназияда лезги ч1аланни литературадин муаллимвиле кIвалахзава. Вичихъ чIехи агалкьунар авай ам «Дагьустандин 2000-йисан муаллим» конкурсдин гъалиб, 2007-йисан РФ-дин Президентдин «РФ-дин лап хъсан муаллим» грантдин ва «Дагъустан Республикадин лайихлу муаллим» лагьай гьуьрметдин т1варцIин сагьиб я.
Гъ.Ибрагьимова «Гатфарин авазар», «КIанда заз рагъ», «ТIебиатдин къужахда» ва «Булахдин чешмедал» ктабрин автор я. Адахъ туькIвей хизан ава. Адан уьмуьрдин юлдаш чи сейли композитор Къагьриман Ибрагьимов я. И кьве инсанди руьгьдин садвилелди туькIуьрнавай 60-дав агакьна манияр мецера гьатнава: «Гьажи Давуд», «Мехъер бахт я», «Чан ширин», «Эсли», «Ая кам», «Мешебеги»... Абурун гзаф шиирарни манияр «К1анда вун», «Милли музыка школада» ктабра гьатнава. Фаризат Зейналовади лугьузвай «Зи лезги ч1ал» манидай Гъулангерек 2013-йисуз «Зи лезги халкь» премиядиз лайихлу хьанва.
Шаирди вичи регьбервал гузвай «Лацу лиф» литературадин кIватIалда лезги шаиррихъни кхьирагрихъ галаз мукьвал-мукьвал гуьруьшар, межлисар тешкилзава. Аялри рикI алаз а межлисра иштиракзава.
ГЪУЛАНГЕРЕК ИБРАГЬИМОВА
ХУЬРУЬН РЕГЪВЕР
Чи хуьре, зун аял тир а вахтуна,
Регъвер авай, кицик багъдин тахтуна.
Регьведай къуьл кьуна халкьди нубатар,
Пагь, регьверив гвай хьи зурба гьайбатар.
Дидед гъил кьаз, манидалди илигиз,
Зунни фидай, регьуьн къванциз килигиз.
Йигин къубу зарбуналди авахьдай,
Чархар элкъвез регъверини кIвалахдай.
Къуьл тухвана, гъуьр хкидай кIвалериз,
Сагърай лугьуз гьа регъверин къванериз.
Аламат тир заз и крар, гьелбетда,
Регъуьхъбандиз вири хуьруь гьуьрметдай.
Гъуьр хкайла, зи дидеди секиндиз,
Фу чрадай хьрак – гьикьван ширин тир!
Атир гьатдай михьиз хуьруьн магьледа,
Рагъ куькIуьдай чанда, рикIин сегьнеда.
Гьайиф, вахтар, хуьре багъ, регъв мад амач,
ЦIам-кIарасдив хьар кутадай сад амач.
Цин регъверни рикIел садан аламач,
Газдал чрай фарихъ атир галамач.
ВИЛИКДАЙ ВА ГИЛА
Виликдай хуьре хьайила мехъер,
Валлагь, виридак акатдай хьи хъвер.
Мугьманрин кIвачик ярхардай гьер,
Ахпа шаддаказ ийидай кьуьлер.
Гила лагьайтIа, секин я кIвалер,
Гьич садакни кIус кумач ерли звер.
Залра, пул гана, ийизва мехъер,
Аламат я и девирдин тегьер.
ЖЕДАЙ ТУШ
Хун тавур цал кIвалин къеняй,
Къецелай гьич хаз жедай туш.
Чинал шад яз, пехил рикIяй,
Касдикай дуст кьаз жедай туш.
Ичин тарцел анар, чуьхвер,
Алаз къведай гад жедай туш.
Дустунин дерт залан тежер,
РикI авай гьич сад жедай туш.
ГьакI кIанивал рахадайдан,
Кьве мез сиве вич жедай туш.
Вилик чан гуз, кIасиз дабан,
Кьве чин алаз гьич жедай туш.
Гьар жуьредин ава къилих,
Синих квачир сад жедай туш.
На хуьналди халкь, чIал, тарих,
Душманар гьич шад жедай туш.
ДИДЕНИ ЧIАЛ
Гьахьнава мад зун фикиррин деринра,
Ширин диде, вун рикIеваз виринра.
Вун сагъ амач гьайиф чIугваз шезва зун,
Балаяр хуьз, гьа ваз ухшар жезва зун.
Багьа инсан, гьар легьзеда герек тир,
Вун чаз даим гьар са карда куьмек тир.
ЧIимел югъни цифер алай перишан,
Ви нефесди ийидай хьи гуьлуьшан.
Са югъ авач вун зи рикIе авачир,
Ви тIвар, ви тарс зи мецел гьич алачир.
Вун аквазва шад ракъинин нурарай,
Ви ван къвезва хайи чIалан гафарай.
Вун багьа яз, диде, ви чIал хуьзва за,
ЧIалан никIе шииррин сел гуьзва за.
Дидени чIал чандиз мелгьем, дарман я,
Абур пакдиз хуьн тийирди душман я.
Скачать PDF
Комментарии к статье
Будьте первым кто оставит комментарий к статье.Оставить комментарий