Алай йисан 28-но­ябрдиз С.Вургъунан тIварунихъ галай Азер­байжандин Гьу­ку­матдин Урус Драм­театрдин дараматда Дагъустандин Азер­байжан Республикада авай векилвилин ида­ради кьил кутур чIе­хи мярекат – Да­гъустандин халкьдин шаир Расул Гьамзатован 95 йисан юбиледихъ авсиятда эдебиятдинни музыкадин няни кьиле фена.

     Шаир рикIел хкидай мярекатдиз гзаф мугьманар, Азербайжандин медиадин ва эдебиятдин кIватIалрин векилар атанвай. Мугьманрин арада Азербайжандин Медениятдин Министерстводин, Кхьирагрин КIва­тIалдин, РФ-дин чи республикада авай посольстводин векиларни авай.

     Расул Гьамзатован фондунин вице президент Гьабибат Азизовади, «Къафкъаз» ассоциациядин президент Хасайбат Валиевади ва Дагъустандин Бакуда авай даиман векил Марат Аскендерова тебрикдин гафар лагьайдалай гуьгъуьниз мугьманриз гаф гана. Дагъустандин Кхьирагрин КIватIалдин седридин заместитель Марина Агьмедовади, гьа и тешкилатдин секретарь Сувайнат Кюрбековади, Азербайжандин Кхьирагрин КIватIалдин кьил Анар Рзаева, кхьираг-журналист, «Самур» газетдин кьилин редактор Седакъет Керимовади ва масабуру шаирдин яратмишунриз талукьарнавай марагълу рахунар авуна.

     Эхирдай Дагъустандин халкьдин артист Адалат Шуькуьрова ва Азербайжандин Милли Консерваториядин солист Решад Ибрагьимова Расул Гьамзатован чIалариз теснифнавай манияр лагьана. «Сувар» ансамблдин кьуьлердайбуру авур кьуьлери, гьакIни «Гуьнай» студиядин аялри хуралай кIелай шиирри вири гьейранарна. Мярекатдин вахтунда талукь фотовыставка кардик кутуна, чIехи шаирдикай документрин бинедал алаз туькIуьрнавай куьруь метраждин фильмаяр къалурна.