Гзаф йисар тир КцIарин дагъдин хуьрерин агьалийри рекьерикай азият чIугваз. Иллаки хъуьтIуьн варцара иниз атун-хъфин лугьуз тежедай кьван четин жезвай. Агьалийри и кардихъ авсиятда шумуд йисар тир вини  тешкилатриз чарар кхьиз. Эхирни талукь тешкилатриз абурун ван хьана. Азербайжандин Президентди и кар патал пул чара авуна. 

    Алатай йисан эхиррилай кьил кутуна Яргундилай винидихъ квай са шумуд хуьруьн рекьер гуьнгуьна тваз эгечIнай. Рекьер гегьеншарун, цIалцIамарун, чиле битум кутун патал иниз герек тир чIехи техника желбнай. Гила гьа рекьера асфальт твазва. Кичан хуьре и кар кьилиз акъуднава, ТIигьирани кIвалахар тамамарнава. Гила рехъ тухузвайбур ЧIехи Муругъа кардив эгечIнава. Нубатда ЭчIехуьр ва КIур хуьрер ава. Асфальтдин рехъ Яргун-ТIигьиржал рекьихъ галкIурда. Хурхадикайни рукадикай чан куьтягь хьайи дагъдин хуьрерин инсанрин хвешивилин и кьил, а кьил авач.

 

«САМУР»