Газета Самур

Алибег Фетягьов рикIел хкана
Юбилей | 6(343) 2020

Алай йисан 23-сентябрдиз «Самур» газетдин коллективди Бакуда Россотрудничестводихъ галаз санал лезги эдебиятдин классик Алибег Фетягьов дидедиз хьайи 110-йисан юбилей къейд авуна. Пандемиядив кьадайвал, мярекат Россотрудничестводин дараматда, тIимил инсанрин иштираквилелди кьиле тухвана.

Мярекат Россиядин информациядин меркездин чирвилериз талукь программайрин координатор Любовь Якунинади ачухарна. Ада Алибег Фетягьов Советрин эдебиятдин машгьур векилрикай тирди, чи классикди А.С.Пушкинан, М.Ю.Лермонтован, В.В.Маяковскийдин ва маса шаиррин шиирар урус чIалай лезги чIалаз элкъуьрна кIелдайбурув агакьарнавайди, гьа идалди чи халкьарин арада дуствилин ва эдебиятдин алакъаяр мягькемарунин кардик чIехи пай кутунвайди кьилди къейд авуна. Ахпа ада «Самур» газетдин редактор Седакъет Керимовадиз гаф гана.

Алибег Фетягьован уьмуьрдинни яратмишунрин рекьикай рахай С.Керимовади кIелдайбурун гегьенш къатариз тийижир са кьадар делилар мисал яз гъана, шаирдиз девирдин чIулав къуватри датIана басрухар гайиди, адакай гзаф делилар къедалди винел акъуднавачирди, и чIалан устаддин уьмуьрдин рехъ ва яратмишунар генани мукьувдалди чирна кIанзавайди важиблу тирди къалурна.

«Самур» газетдин кьилин редактордин заместитель Муьзеффер Меликмамедова Алибег Фетягьовакай урус ва лезги алимрини шаирри лагьанвай гафар рикIел хкана, адан журналистикадай мисалар гъана. Ада къейд авурвал, Алибег Фетягьован хкягъай чIалар кьилдин ктабар яз акъудунин карда гзаф зегьметар чIугур чи машгьур журналист ва кхьираг Назир Агьмедова кхьенай: «Алибег Фетягьов садавни гекъигиз тежедай поэзиядин дагъ я. Дуьньядин эдебиятда ихьтин жаван ва кьакьан дагълар тIимил ава».

Мярекатдал рахай Азербайжандин радиодин лезги чIалан гунугрин редактор Роза Гьажимурадовади Алибег Фетягьован чIалан фасагьатвиликай ихтилатна.

Поэзиядал гзаф рикI алай «Самурдин» кIелчи Асиф Салманова ва газетдин кIвалахдар Анна Гьасанбеговади шаирдин шиирар кIелна.

Алибег Фетягьован яратмишунрикай веревирдер ийидай вахтунда «Самур» Лезги Милли Меркездин кьил Имран Рзаева марагълу теклиф гана: «Алибег Фетягьован са шумуд эсер азербайжан чIалаз элкъуьрна абурун лезги текстерни галаз санал ктаб хьиз чап авун». Ада гьакIни ктаб «Самур» Лезги Милли Меркезди чапдай акъудда лагьана хиве кьуна.

Гзаф марагълуз кьиле фейи мярекатдин иштиракчийри эхирдай карантин куьтягь хьайила Алибег Фетягьован юбилей гегьеншдиз къейд авун къарардиз къачуна.

«САМУР»

Шагь-Эмир Мурадов,

Дагъустандин халкьдин шаир

Алибег

ЧIаларив мармардал нехишар атIуз,

Девирдин гьар са тIал дериндай кьатIуз,

Лап жаван яз уьмуьр куьтягьна куз-куз,

Вучиз гьалнач вуна девран, Алибег,

ТIварни кар туна чаз масан, Алибег.

Зунжурар кьатI-кьатIиз уьмуьрдин куьгьне,

Чириз гьар са кардин тарихдин дегьне,