Чи алимрин агалкьунар къвердавай вири халкьдик руьгь кутадайбур жезва. И мукьвара  Москвада мад са лезги алимдин зурба алакьунар винел акъатна.

Дуьньядин чIехи илимрин меркезрикай тир Россиядин Илимрин Академиядин Рагъэкъечъдай патан уьлквеяр чирдай институтдиз гила тIвар-ван авай алим, чи ватанэгьли Аликбер Аликберова регьбервал гуда. 2015-йисалай и институтдин директордин заместителвиле кIвалахай алимди алай йисан 19 - августдиз кьиле фейи директор хкядай сечкийра виридалайни гзаф – 247 сес кIватIна. 

    Машгьур востоковед – Юкьван Азия, Къафкъаз, Урал-Поволжье чирзавай илимдин меркездин кьил, Гьукуматдин Гуманитар Илимрин Университетдин талукь факультетдин декан, РИАдин эксперт Аликбер Къалабеган хва Аликберов 1964-йисуз Дагъустан Республикадин Хив райондин Хъукъвар хуьре дидедиз хьана. 1968-йисуз ада Дагъустандин Гьукуматдин Университетдин тарихдин факультет тафаватлувилелди акьалтIарна. Гуьгъуьнлай Ленинграддин Гьукуматдин Университетда ва СССР-дин ИА-дин РагъэкъечIдай патан уьлквеяр чирдай институтдин аспирантурада кIелна. Кандидатвилин диссертация Санкт-Петербургда, докторвилин диссертация Москвада хвена.

    Россиядин ИА-дин тарихдин, археологиядин ва этнографиядин Институтдин рагъэкъечIдай патан уьлквеяр отделда кIвалахай А.Аликберова Каирда ва Оксфордда чирвилер къачуна. Ам 130-далай гзаф илимдин кIвалахрин, РагъэкъечIдай патан уьлквейрин, гьакIни исламдин тарихдиз талукь къиметлу эсеррин автор я.

 

Теяра ВЕРИМЕТОВА,

Москва шегьер