Газета Самур

Хъсанвилин чIал
Мах | 6(343) 2020

Вичин жемятар фадлай арандиз куьч хьанвай дагъдин хуьре са къари амай. Масабурувай хьиз хайи хуьр гадарна физ хьанвачир адавай. «Ина кьве кьуьзек ама – зунни регъв», – лугьудай къариди вичи-вичиз. Вичин кесиб дехмеда четинвилив кьил хуьзвай ада.

Къуьл кIватIна регъуьз тухудай, ана регъвена хкидай. И гъуьруькай фу чрана вичини недай, къушариз, гьайванризни гудай. Кьарай татайла къушаривни гьайванрив рахаз, абуруз манияр лугьуз югъ акъуддай. Умун къариди садни рикIелай алуддачир, вичи тIуьрдакай кьиферизни пай гудай. ЦIерцIер гъиз тамуз фейила тарарин ханвай хилер кутIундай, начагъ хьанвай гьайванриз чара ийидай. Гьавиляй къушаризни гьайванриз къари пара кIандай. Къаридин манийрихъ яб акалун патал абур фад-фад адан дакIардихъ кIватI жедай.

Садра къари начагъ хьана месе гьатна. Адан ван текъвез акурла виридак къалабулух акатна. Къушари дакIардай къенез килигайла абуруз рангар къекъифнавай къари месе аваз акуна. «Къаридихъ цIинин йисуз цан цана къуьл кIватIдай такьат хьанач. Гьавиляй адан кандуярни ичIи я. ХъуьтIуьн гьазурвилер акун тавуртIа, ам гишила амукьда», – цIив-цIивна къушари.

Къаридиз куьмек гуз кIан хьайи къушари тамун вири гьайванар кIватIна, абурун гьарадан хивез са кар вегьена. Муьнуьгъри хьрак кутадай цIерцIер ялна. ЦуцIулри шуьмягъарни бебелукар кIватIна.

Къуьрери гьинай ятIани келемарни газарар гъана. Севре кварцеваз булахдай яд гъана. Къушарини кьифери никIяй къуьлуьн тварар жагъуриз, абур регъуьз ялзавай. Нянихъ инал къуьлуьн чIехи са хара арадал атана. Гила абур къуьл регъвез алахъна. Ингье регъуьн чарх сакIани элкъвезвачир. Гьавиляй къушарин лужуни цавуз хкаж хьана, ахпа садлагьана чархунал вегьена. Эхирни чарх кардик акатна.

Ина кIвалах ргазвай. Кьифери къуьл регъуьн къванерин арадиз вегьизвай, цуцIулрини кьуьгъуьрри гьазур гъуьр шешелриз кIватIзавай. Жанавурди ацIай шешелар севрен далудал эцигзавай. Адани и раж къаридин кIвале сикIрехъ галаз санал кандуйриз ацIурзавай.

Няналди кандуяр сиве-сивди гъуьредив ацIана. Нянихъ тIал элекьна вилер ахъаяй къари пагь атIана амукьна. Хвеши хьайи ада фад меселай къарагъна верчери кIватIнавай хъчарикай афарар чрана. Тухдалди вичини тIуьна, къушар, гъайванарни илифарна. «Вуч хъсан я захъ куьн ава, дустар! Чун гьарма са чIалал рахазватIани, хъсанвилин чIалан гъавурда вири акьада», – лагьана ада вилерал хвешивилин накъвар алаз.

АЗИЗРИН Севда