Фольклор | 6(343) 2020
«Купул вир»
Къубадин Хъимил хуьре тIебиатдин къадим гуьмбетар гзаф ава. Абурукай сад «Купул вир» я. Вич алгъай кIунтIунал алай, са акьван чIехи тушир и вирин яд начагъвилерин дарман я. Адан куьмекдалди купул, верем, бруцеллёз, къен фин ва маса азарар сагъарзава.
Цикай менфят къачун паталди кIвенкIве са шумуд чIехи къванер цIал чимна вириз вегьеда. Яд чими хьайила, азарлуди вире кутуна
къаткурда. Са герендилай цяй акъудда. Са шумуд юкъуз галай-галайвал и кар тикрар хъувурла азарлуди хъсан жеда.
Дендед тарар
Хуьруьн рагъэкIидай пата – Хъимил-Куьснет рекьин эрчIи пата 0,16 гектардин чкада сад-садавай 4-5 метр кьван аралу тир 10 дендед тар ава. И чкадиз «Пирнехирван» пIирни лугьуда. Къуба райондин Хъимил, Хъимил Къазма, Куьснет, Куьснет Къазма, Уьшкуьн хьтин лезги хуьрерин, гьакIни маса къунши хуьрерин агьалияр иниз зияратдиз къведа.
Тарарин тандин гьяркьуьвал 2-3 метр, кьакьанвал 30-35 метр я. Ина цIийи дендед тарарни экъечIнава. И чкада 16 къадим сур ава. Абурун гуьмбетрал алай кхьинар кIел хъжезмач. Садбуру тарар гьа сурарихъ галаз са девирдинбур я лугьузва.
«Пирнехирван» пIир авай чкада «Азербайжанфилмди» «Зун мад хкведа» филмдин бязи эпизодар чIугунва.
«Сусан кьвал»
Хъимилин чилерилай тIуз физвай Кьуру вацIун кьибле-рагъэкъечIдай пата, Куьснетивай 1500 метр кьван яргъа авай, вичин кьакьанвал 250 метр тир кьвалаз «Сусан кьвал» лугьун дуьшуьшдин кар туш. Риваятда лугьузвайвал, Куьснет хуьре сад-садал рикI алай са гадани са руш авай. Рушан хайибуруз ам кIани гададиз гуз кIан хьанач. Абуру чпин руш къунши
Хъимил хуьруьз гудайвал хьана. Мехъерин юкъуз свас арабада аваз аниз тухудайла рушаз кьвал аквада. Ада гьасятда арабадай хкадарна вич кьвалалай вегьеда кьван. Гьа йикъалай и кьвалан тIварни «Сусан кьвал» хьиз амукьна.
Шихеммед СЕЙИДМАМЕДОВ,
Къуба район
Скачать PDF
Комментарии к статье
Будьте первым кто оставит комментарий к статье.Оставить комментарий