Ашукь Нуьсрет
Харусенят  |  4(349) 2021      
    Лезгийрин рикӀ алай сеняткар, вичи тесниф авур чӀаларни авазар халкьдин меце гьатнавай Мирзебегов Нуьсрет Черкесан хва 1940-йисуз КцӀар райондин ПӀитӀишкӀеле хуьре дидедиз хьана. Адан аялвал дяведин йисариз туьш хьана. Буба дяведа гьелек хьайила дидеди Нуьсретни адан чӀехи стха Фергьад Мердакандин детдомдиз гана. Фергъад аскервилиз фидалди стхаяр санал хьана.
    Вичихъ шаирвилинни ашукьвилин алакьунар авай жегьил Нуьсрет 14 йиса авайла ам Шушадиз, ашукьрин гьуьжетунрин мярекатдиз ракъурна. Ина ам чӀехи сеняткар Ашукь Шемширахъ галаз таниш хьана. Адан алакьунар акур ашукь Шемшира и етим гада шакӀуртвиле кьабулна ва вичихъ галаз Келбежер райондин Агъдабан хуьруз тухвана, адаз ашукьвилин сирер чирна. Лезги ва азербайжан чӀаларал шиирар кхьиз, абуруз авазар теснифиз, чуьнгуьрдал ягъизвай Нуьсретахъ успагьи кьуьлни авай.
    Ашукь Шемширавай рухсат къачур Нуьсрета Азербайжандин гзаф районра, хуьрера къекъвена элдиз вичин гьунар къалурна. Ам ватандиз устад сеняткар хьиз, 28 йиса аваз хтана, хайи хуьре мехъерна вичиз къул авуна. ГуьндуьзкӀеле хуьруьн медениятдин кӀвале ада туькӀуьрай “Самур” ансамблдин суракьар яргъариз чкӀана.
    Халкьдин рикӀ алай “Шагьзада”, “Дустар” хьтин 100-елай гзаф манийралди сейли хьайи Ашукь Нуьсрет “Магьу дере”, “Ахцегьиз сефер”, “Мискискайрин булахрал”, “Шагьнезер ва Симузер”, “Рушан бубадиз арза”, “Урусатдиз сефер” хьтин муьгьуьббатдин дастанрин авторни я. Ада Азербайжанда хьиз, Дагъустанда ва Гуржистандани шумудни са гур межлисар тухванай.
    Ашукь Нуьсрет ашукьвилин рекьяй чи музыкадиз цӀийивал гъайи сеняткар я. Ада сифте яз чуьнгуьрдал чӀагъандихъ галаз санал ягъин деб кутуна ва вири гьейранардай авазар теснифна.
    1987-йисуз СССР-дин халкьарин яратмишунрин фестивалдин лауреат хьайи Ашукь Нуьсрет фестивалдин медалдиз лайихлу хьана. КцӀарин куьчейрикай садаз Нуьсрет Мирзебегован тӀвар ганва. 
    2020-йисуз Бакуда Ашукь Нуьсретан яратмишунриз талукьарнавай “Зи чуьнгуьр зи уьмуьр” тIвар алай ктаб басма хьана. Ктаб туькIуьрайди Вакъиф Гьажагъаев-Муьшкуьрви, редактор Джавид Агьмедов-Миграгъви я. 
 
Шагьзада
 
Вун акурла къакъатна зи дин-иман,
Лагь, ашкъидин пар яни вун, Шагьзада?! 
Жегьил ашукь хьана кIани ваз мугьман, 
Вилерин ахвар яни вун, Шагьзада?!
 
Кузва зи рикӀ ви ашкъидин авазди,
Вад къан уьмуьр ракъун за вахъ галазди, 
Дерт пара я, кьуна хурал ягъазди, 
Чуьнгуьр яни, тар яни вун, Шагьзада?
 
Ша, зун вуна жуваз кIани са яр яхъ,
И зи метлеб фадвилелди кьиле твах, 
Билбилди хьиз макьамриз гьар пакамахъ, 
Цуьквераллай гар яни вун, Шагьзада?
 
Къурбанд я зун а ви катран вилериз,
Хине чӀугур гъилеризни цӀвелериз,
Чи кIанивал ашкар тахьуй эллериз, 
Бафтадик квай зар яни вун, Шагьзада?
 
И дуьнядал чун вад йикъан я мугьман, 
Дертлудан дердиниз ая на дарман, 
Ахъая на гуьгьуьл Ашукь Нуьсретан, 
Жаваб це заз, яр яни вун, Шагьзада?
 
 
Гуьзел
 
Акъвазна вун хаму кард хьиз ,
Лагь кван, ви тӀвар вуч я, гуьзел.
Мецив ширин гафар ийиз,
Вун зи рикӀиз хуш я, гуьзел.
 
Авадарна яргъи кифер,
Гьинихъ я, лагь заз, ви сефер,
Юкьва аваз зардин кемер,
Вун женнетдин къуш я, гуьзел.
 
Кьилел алаз Генжедин шал, 
Харад перем хьайила сал,
Ша, атӀутӀ на зи рикӀин тӀал, 
Хьана зун бейгьуш, я гуьзел.
 
Кьабула на лагьай гафар,
Я хиял туш, яни ахвар.
Жаваб це заз, мийир рикӀ дар, 
Вун свас яни, руш, я гуьзел?
 
Яб це, зи тӀвар – ашукь Нуьсрет, 
Заз вун кIани хьанва, гьелбет. 
Захъ галаз икӀ ширин суьгьбет 
Ая тӀун, заз хуш я, гуьзел.
 
"Самур"
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Жегьил къелемэгьлидин савкьватар Сад лагьай чка кьуна Ханбутай бег Яргунви Poliqlot
Статьи из этой рубрики
«Сувар» ансамблдин 20 йис! ЦIийи фильм – «Квахьай йикъарган» Решадан шегьре рехъ Розадин мурад Festivalda ləzgi musiqi səsləndi
ЦIИЙИ ТИЛИТ
№: 8(353)
декабрь, 2021

Скачать PDF

РУБРИКИ
Tarixin izi ilə
Gəncliyimiz – qürurumuz
Чи къагьриманар
Yubiley
Люди и судьбы
Шаирар
"Самур" - 30
Редакциядин дустар
Яран сувар
Qarabağ müharibəsi
Diqqət: İnsan taleyi!
İnam və iman
"Soyuq günəş"
ЦIийи фильм
Dünya xalqları
Чи тарих
Тарих авайвал
Müsahibə
Спасём планету
Dünya ləzgiləri
Дагъустан
Диктант
Чи кьегьалар
Редактордин гаф
Чи классикар
"Самур" - 20
Мах
ЦIийи ктабар
Жеч гьа!..
Dağıstan xalqları
И чил хайи диге я
Добрые вести
Milli Məclisə məktub
Новости Россотрудничества
Известные лезгины
Марагълу инсанар
Redaksiyaya məktub
Языки мира
Лезги чIалан месэлаяр
Квез чидани?
Известные лезгиноведы
Лезгияр вирина
Юбилей
SOS!!!
С верой в душе
"Самурдин мектеб"
Мораль
Чи адетар
Məşhur ləzgilər
Новости на все голоса
Чи хуьрер
Хъсан хабарар
Известные кавказоведы
Чи адетар
Yeniliklər
Чешне къачу!
Чакай кхьенай ...
Алимрин веревирдер
Çıxışlarımızın əks-sədası
Барка
Эпитафия
Ша, лезги чIалал рахан!
Хабарар
Тарихдин геле аваз
Поэзия
Харусенят
Этнография
Дагестан
Народы мира
Спорт
Инсанар, кьисметар
Редакциядиз чар
Чир-течир
Yeni kitablar
Фольклор
Чи сейлибур
Дайджест
Чи тавдин кIвал

ПОЛЕЗНОЕ