Газета Самур

"Самурдин" 30 йис жезва
Редакциядиз чар | 4(349) 2021

КЪУЬН КУТАН

Играми «Самурдин» кIвалахдарар! Газетдин 2021-йисан 28-апрелдин нумрадиз акъуднавай кьилин макъалади заз кIевелай эсерна. Газет акъудун патал куьне гьикьван азият чIугвазва. ГьакI ятIани, гзаф кIевера гьатзаватIани «Самур» акъвазарзавач. Им куь хайи халкьдални хайи чIалал гзаф рикI алайвилин, датIана абурун таъсиб чIугунин нетижа я. Руьгьдай ават тавуна, жувал дуьшуьш жезвай четинвилерикай садазни талана инсанрик руьгь кутун гьар касдилай алакьдач. Авайвал лугьун хьи, са патахъайни куьмек авачиз газет акъудун кьегьалвал я. Куьне халкь патал гьихьтин кардик къуьн кутунватIа, чна

хъсандиз кьатIузва. Къуьруь тахьуй куь къелем, галат тавурай куьн, лигим руьгь авай.

Гила жуван веревирдерикай лугьун. Яраб чи карчияр редакциядив вучиз агатзавач? Дидед чIал хуьн патал датIана женг чIугваз-вай, чи тарихар винел

акъудзавай, чи жуввал вилик тухузвай газетдин далудихъ галаз хьун вичин кьадар виш агъзурралди тир халкьдин буржи тушни? Хуруз гъил яна чун лезгияр я лугьузвай, лезгивилелди дамахзавай ксар вутI хьана? Маса халкьарин газетрини журналри юбилеяр тухун патал гьазурвилер аквадайла абуруз чпин агьалийри куьмек гуда. Бес чибуру вуч фикирзава? Маса крар лугьудач, гьич тахьайтIа, са газет кхьин гьакьван четин яни?

Чи цIудралди хуьрерин агьалийри газет къачузвач. Яраб абурухъ руьгьдин каш авайди туш жал? Абуруз чи бубаяр вужар тиртIа, чахъ гьихьтин тарихар, адетар, ацукьун-къарагъун авайтIа вучиз чириз кIанзавач? Газетди кьилди хуьрерикайни сад-садалай марагълу ма-

къалаяр чапзавайди аквазвачни абуруз?

Къе заз жуван ватанэгьлийриз эвер гана лугьуз кIанзава: Хайибур, ша чна «Самур» гьар хизандиз лагьай кардик къуьн кутан. Юбилейдалди газетдин тираж хкажиз алахъин. Гьа икI, «Самурдин» коллективдизни разивал къалурин.

Шихмет Мурадов,

Баку

КУЬМЕК ГУН

Гьуьрметлу редакция! «Самур» газетдин 30 йис жезва лагьайла чаз гзаф хвеши хьана. Чи чIалан женгчи хьиз вириниз сейли хьанвай газетди и 30 йисан къене халкьди гьуьрметуниз лайихлу рехъ фенва. «Самурди» 2018-йис дидед чIалан йис хьиз малумарайла чи мектебди и вакъиа кьилди къейд авунай. Чна мектебдин лезги чIалан кабинетда «Самурдин» гьа нумра кьулунал яна, гьадан кIаникай чIалан йисахъ галаз авсиятда кьиле тухвана кIанзавай мярекатрин сиягь алкIурнай. Гуьгъуьнлай а крар вири кьилиз акъуднай. Авайвал лугьун хьи, мярекатри чи аялрин дидед чIалаз кIанивал генани артухарна. «Самурди» мектебдин коллектив мадни сигъдаказ агудна. Гьа инал лугьун хьи, бязи нумраяр чав агакьзавачтIани, чи аялри газет рикI алаз кIелда. Вучиз лагьайтIа адахъ гзаф фасагьатлу чIални дерин метлебдин макъалаяр ава. «Самурдин мектеб» чина гузвай макъалайрай чна гзаф шейэр чирзава. «Гафарган» рубрикадик кваз гузвай материалрай чаз цIудралди чи къадим ва цIийи гафар чир хъхьанва.

«Самурди» гьахълу яз алай вахтунда чи виридалайни кар алай кIвалах хайи чIал хуьн ва вилик тухун хьана кIанзава лугьузва.

Гьакъикъатдани акьалтзавай несилдиз дидед чIал, диде ватан кIанар тавуртIа, чи лайихлу давамчияр арадал къведач. Куьне фикир це, исятда урус чIал хьтин чIехи чIал чIур хьунин хаталувал ава. Урусатдин гьукуматди эхиримжи йисара адан михьивал хуьн патал галайвал ийизва. И кар фикирда кьуртIа, чна чи чIал хуьн патал кьве къат, цIуд къат алахъунар авуна кIанзава.

Чка атанваз редакциядиз кьве теклиф гуз кIанзава. Эхиримжи йисара «Лезги чIаланни азербайжан чIалан гафарган» ва «Азербайжан чIаланни лезги чIалан гафарган» арадиз гъунай Седакъет Керимовадиз ва Муьзеффер Меликмамедоваз халкьдин патай баркалла къвезва. И къелемэгьлийри чи къадим ва цIийи гафарин гафарганни туькIуьрнайта хъсан жедай.

Кьвед лагьай теклиф. 2022-йисуз «Самурдин» 30 йисан юбилей кьиле тухун фикирда кьунва. Жечни гьа йис «Самурдин» йис хьиз малумарайтIа? АкI хьайитIа, кIелдайбуруз «Самурдив» генани мукьувай агатдай мумкинвал жедай. Коллективди чкайрал мярекатар тухудай. Месела, 2016-йисуз «Самурдин» кIвалахдаррин Дагъустан Республикадин СтIал Сулейманан райондин кIелдайбурухъ галаз кьиле тухвай гуьруьш хьтин. Ихьтин мярекатар Дагъустандин маса лезги районрани тухванайтIа хъсан жедай. И крар кьилиз акъудун патал лагьайтIа, чна редакциядиз мукьувай куьмек гана кIанзава. Куьмекни гун, играми кIелдайбур!

Букар Эмиралиев,

Дагъустан Республикадин

Дербент шегьердин 2-нумрадин

мектеб-интернатдин дидед

чIалан ва эдебиятдин муаллим