Гатфари ашкъ агудзава
Поэзия  |  4(349) 2021      
АШКЪ АГУДЗАВА...
 
КукIва къугъваз чими гарар, 
Цуькведава шефтелдин тар. 
Кьве билбилди чIугвазва цIар, –
Жегьре цуьквер авудзава, 
Гатфари ашкъ агудзава. 
 
Салун пипIе свас хьиз акваз, 
ПIини ала хилер юзаз. 
ЧIижер чпихъ «лишан кутаз» , 
Гьа цуькверал ацукьзава, 
Гатфари ашкъ агудзава. 
 
Чи тутун тар, къенфетдин тар, 
Цаварин пай, женнетдин тар, 
Пирпилдамай мармалатар… 
Куьне сабур къакъудзава, 
Гатфари ашкъ агудзава. 
 
Ичер, чуьхвер, жумар, хватар… 
Саки къванва бегьердин хар. 
Лацу, яру, мили тIурар, 
Чин чуьнуьхиз – регъуьз ава, 
Гатфари ашкъ агудзава. 
 
ГъвечIи-чIехи – алтIушна эл, 
Гьамиша хьиз авунва мел. 
Хуш авазар къвезва мецел, 
РикIера тваз мили гьава, 
Гатфари ашкъ агудзава....
 
ПАК ГЬИССЕРИН ГЬУЬЛ
 
Пагь, гьикьван иер я и марваррин чуьл,
Вуна ви гъилерив заз кутунавай.
Ашкъид лишан яни, пак гьиссерин гьуьл,
Зи руьгьдин къумлухда вуна цанавай?
 
Лепейриз ухшар я гьар са лацу кул,
Гарари авазрив эчIягьиз авай.
Тушни заха савкьват заз и цинин зул,
Гатари, гатфарри пехилвалзавай…
 
Белки кIурукIар я кIанивилин муг,
Сад садан къужахда – саф пешерин тахт…
Вучиз яргъал физвач, лагь, жезва руг-руг, 
Пашманвал гъуналди кьуразват1а бахт... 
 
Пагь, гьикьван иер я чи марваррин чуьл,
Куьн акваз гьар юкъуз шад жезва гуьгьуьл...
 
АЛАХЬАЙ ЙИФЕР
 
Гьикьванни иер я, и варз алай йиф, 
Гъетер хиялар хьиз чкIанва гьарнихъ. 
Куьн акваз кIанзавай рикI жечни зайиф, 
Алахьай йиферихъ къарих тир, къарих… 
 
Рапрапиз гъетери цавун къатарай 
Саки рахазва заз чинебан гафар. 
Йиферин дустар зи – ахвар квахьнавай, 
Сирерал кIевибур ятIа куьн, вахар? 
 
Гару къужахдаваз тухвана цифер, 
Секиндиз ксурна цаварин гине. 
Амма вич хурамдиз элкъуьриз кифер, 
Экверин арада – къекъвезва вине.
 
Вацра килигзава сивик галаз хъвер, 
Себебар вуч ятIа, къекъиф я хъуьхъвер. 
МичIиз-ахъайзава ири тир вилер, 
Аватиз кIвачерик кIакIамрин хъенер… 
 
Гьикьванни иер я и варз алай йиф, 
Гъетер хиялар хьиз чкIанва гьарнихъ. 
Мукьвара яр жеда, гьайиф, вуч гьайиф, 
Мадни хъижеда зун йиферихъ дарих…
 
КIАНИ Я ЗАЗ 
 
Заз пара акуна чара уьлквеяр, 
Гегьенш зурба чуьллер, хуьрер, шегьерар. 
ТIимил расал хьанач жуьреба ксар, 
Чпиз хас къилихар авай инсанар. 
 
Заз пара акуна саки чан алай, 
Килигдай чкаяр, суьгьурда твадай! 
Цавун гъарибвилер, чилин савкьватар, 
Эгей, ЧIулав, Яру… гьуьлуьн къуватар. 
 
Хъсан я виринра, гьина чун хьанач, 
Амма зи убадив къведайди авач! 
Гьикьванни мукьва я заз хайи ватан, 
Бубуйрин, жейранрин, лекьерин макан. 
 
Санихъни дегишдач за хайи КцIар, 
Иер я и чIурар, иер я вацIар… 
Руьгьдиз ашкъи гъизвай къайи булахар – 
Суварин сунаяр, тамун дамахар. 
 
КIани я заз Шагьдин жив алай кукIвар, 
Мягькемвал чешне тир сур чIаван рагар, 
Сабурдив хирерин тIалар эхзавай, 
ТIурфанриз, саврухриз муьтIуьгъ тежезвай…
 
Теране Оружева-Керимова
 
 

Комментарии к статье

Будьте первым кто оставит комментарий к статье.

Оставить комментарий

Имя:     Email:

Так же в этом номере
И чил хайи диге я Жегьил къелемэгьлидин савкьватар Сад лагьай чка кьуна Ханбутай бег Яргунви Poliqlot
Статьи из этой рубрики
В поисках талантов Булахда яд ава СтIал Сулейманаз гуьмбет хкажна Лезги чIал кIанарзава Са маса тIям ава Ватандин чилихъ
ЦIИЙИ ТИЛИТ
№: 8(353)
декабрь, 2021

Скачать PDF

РУБРИКИ
Tarixin izi ilə
Gəncliyimiz – qürurumuz
Чи къагьриманар
Yubiley
Люди и судьбы
Шаирар
"Самур" - 30
Редакциядин дустар
Яран сувар
Qarabağ müharibəsi
Diqqət: İnsan taleyi!
İnam və iman
"Soyuq günəş"
ЦIийи фильм
Dünya xalqları
Чи тарих
Тарих авайвал
Müsahibə
Спасём планету
Dünya ləzgiləri
Дагъустан
Диктант
Чи кьегьалар
Редактордин гаф
Чи классикар
"Самур" - 20
Мах
ЦIийи ктабар
Жеч гьа!..
Dağıstan xalqları
И чил хайи диге я
Добрые вести
Milli Məclisə məktub
Новости Россотрудничества
Известные лезгины
Марагълу инсанар
Redaksiyaya məktub
Языки мира
Лезги чIалан месэлаяр
Квез чидани?
Известные лезгиноведы
Лезгияр вирина
Юбилей
SOS!!!
С верой в душе
"Самурдин мектеб"
Мораль
Чи адетар
Məşhur ləzgilər
Новости на все голоса
Чи хуьрер
Хъсан хабарар
Известные кавказоведы
Чи адетар
Yeniliklər
Чешне къачу!
Чакай кхьенай ...
Алимрин веревирдер
Çıxışlarımızın əks-sədası
Барка
Эпитафия
Ша, лезги чIалал рахан!
Хабарар
Тарихдин геле аваз
Поэзия
Харусенят
Этнография
Дагестан
Народы мира
Спорт
Инсанар, кьисметар
Редакциядиз чар
Чир-течир
Yeni kitablar
Фольклор
Чи сейлибур
Дайджест
Чи тавдин кIвал

ПОЛЕЗНОЕ